Il temp dal derby è adina spezial. Las datas dals duels cunter l’equipa da la medema val, da la medema regiun, èn notadas gross en il chalender da mintga giugader da hockey. Il derby occupa ed i va per chattar la resposta sin la dumonda tgenina da las duas equipas da hockey engiadinaisas ch’è la pli ferma.
Inscunter da giugaders che s’enconuschan
Il mund en Engiadina è pitschen ed uschia er il mund da hockey. Ils giugaders dal EHC San Murezzan sco era ils protagonists dal CDH Engiadina enconuschan in l’auter. Perquai sa ins era magari precis sco che l’adversari vegn a giugar. Grondas surpraisas tranter San Murezzan ed Engiadina na vegni betg a dar.
E tuttina, era sche ils giugaders as enconuschan tranter per, sche ils visier vegn montà e sche l’emprim puck vegn bittà en il gieu, lura è ins adversaris. I vegn cumbatti mer mintga puck e per mintga schanza. Cun il tun da partenza en il gieu da derby guardan ins be pli sin l’atgna equipa e sin la victoria. Ed uschia er sin il titel dal retg da hockey en Engiadina.
Impressiuns dal derby engiadinais
-
Bild 1 von 4. Hockey sut tschiel avert a San Murezzan. Bildquelle: RTR.
-
Bild 2 von 4. Hockey ora en il liber a San Murezzan. Bildquelle: RTR.
-
Bild 3 von 4. Pront per il proxim «shift». Bildquelle: RTR.
-
Bild 4 von 4. Giugaders dal CDH Engiadina. Bildquelle: RTR.
San Murezzan cun in nov trenader
Suenter divers onns cun Alexander Aufderklamm sco trenader da l’emprima equipa ha il EHC San Murezzan decidì da vulair in midament. Aufderklamm resta dentant fidaivel a sia equipa e s’occupa da la partiziun da juniors da San Murezzan.
Sco nov trenader per l’emprima equipa ha San Murezzan pudì engaschar Andreas «Chutz» Schneeberger. Il nov trenader è uriundamain dad Olten. El sez ha dà hockey tar Olten, Bienna ed Ajoie en liga naziunala A e B. Suenter sia carriera activa era Andreas Schneeberger engaschà en diversas partiziuns da juniors. Il davos sco schef trenader da l’equipa sut 20 onns dal EHC Basilea. Schneeberger stat per ina clera filosofia da gieu, el vul promover la lavur da team e giuvens talents. Valurs che èn da gronda impurtanza pel EHC San Murezzan.
Sper Andreas Schneeberger che lavura per l’emprima giada en Engiadina ha San Murezzan engaschà anc in vegl enconuschent. Sco trenader assistent è Gian Marco Trivella turnà tar sia equipa da tschep. Trivella ha giugà passa 20 onns tar il EHC San Murezzan. Suenter sia carriera activa era el trenader tar San Murezzan. E suenter ina pausa è el uss puspè enavos tar sia equipa dal cor.
Il pli giuven giugader dal EHC San Murezzan che stat regularmain sin il glatsch è Livio Beck, 18 onns, center.
Engiadina cun equipa fitg giuvna
Il contingent da giugaders da hockey en Engiadina è fitg limità. Pervia da la situaziun perifera, dentant era pervia da scolaziun, u er pervia che ins lavura d’utrò è il dumber da giugaders en la val pitschen. Pervia la situaziun finanziala n'èsi er betg pussaivel dad engaschar giugaders che vegnan natiers. Uschia ston omaduas equipas luvrar cun il material da giugaders ch'è avant mauns.
Giugaders giuvens vegnan uschia gia baud integrads en las emprimas equipas. Il CDH Engiadina ha per exempel dà la stagiun passada la schanza a giuvens giugaders da be sedesch onns da far lur emprimas experientschas en l’emprima equipa. E quai na vegn durant la proxima stagiun ad esser auter.
En l’emprima equipa vegnan ils giuvens giugaders avischinads al hockey dals creschids. Il medem mument dattan quels giugaders er en las equipas da juniors. Dapi onns han quels giugaders da dumagnar ina chargia dubla. Impurtant en quella situaziun è adina che ins na surchargia betg il pensum dals giuvens giugaders.
Il pli giuven giugader dal CDH Engiadina che stat regularmain sin il glatsch è Fabio Filli, 16 onns, attatgader
La statistica pleda ina clera lingua
Ils ultims 10 onns hai dà 15 derbys da hockey engiadinais. Da quels 15 derbys ha il EHC San Murezzan gudagnà 11. Il CDH Engiadina ha pudì decider be quatter gieus a sia favur.
La stagiun passada ha il EHC San Murezzan gest gudagnà omadus derbys. Las stagiuns avant eran pli egualisadas. La curuna da hockey midava da l’Engiadin'Ota en Engiadina Bassa e puspè enavos.
Statistica derbys engiadinais
| 26-11-16 | CDH Engiadina – EHC San Murezzan (2:4) |
| 11-02-17 | EHC San Murezzan – CDH Engiadina (6:5 OT) |
| 25-11-17 | CDH Engiadina – EHC San Murezzan (2:4) |
| 10-02-18 | EHC San Murezzan – CDH Engiadina (5:2) |
| 30-10-18 | EHC San Murezzan – CDH Engiadina (8:5) |
| 28-11-18 | CDH Engiadina – EHC San Murezzan (4:3) |
| 21-09-19 | CDH Engiadina – EHC San Murezzan (0:3) |
| 26-11-19 | EHC San Murezzan – CDH Engiadina (3:2) |
| 2020/2021 | nagins derbys pervia da corona |
| 17-11-21 | CDH Engiadina – EHC San Murezzan (7:3) |
| 12-10-22 | EHC San Murezzan – CDH Engiadina (10:7) |
| 30-11-22 | CDH Engiadina – EHC San Murezzan (4:3) |
| 25-10-23 | EHC San Murezzan – CDH Engiadina (5:0) |
| 10-01-24 | CDH Engiadina – EHC San Murezzan (3:1) |
| 05-10-24 | EHC San Murezzan – CDH Engiadina (4:3 OT) |
| 11-12-24 | CDH Engiadina – EHC San Murezzan (3:4) |
Finamiras da la stagiun: mezfinal ed anc ina giada uschè bun
Durant las davosas stagiuns era per il EHC San Murezzan gia il favrer il campiunadi a fin. L’equipa da l’Engiadi'Ota è adina gia crudà en l’emprima runda or dals playoffs. Il cumbat per ina buna plazza pia gia a fin. Perquai è la finamira da questa stagiun clera: l’equipa vul puspè ina giada far il proxim pass e sa qualifitgar per il mezfinal. La davosa giada è quai reussì avant 10 onns.
Il CDH Engiadina va cun la fiduzia en la stagiun dad avair mussà l’enviern passà la meglra stagiun insumma. Per l’emprima giada en l’istorgia da l’equipa è il CDH Engiadina avanzà fin en il mezfinal. Quai n'era avant anc mai gartegià a l’equipa da l’Engiadina Bassa. Cler che la squadra vul anc ina giada passentar quels sentiments. Per che la conferma da la stagiun passada reusseschia dovri dentant ina massa. La finamira principala dal CDH Engiadina è dad insumma esser da la partida en ils playoffs.