Igl è la pli impurtanta fasa da la stagiun da mountainbike. Dacurt èn stads a Leysin en il chantun Vad ils campiunadis svizzers, l'emna proxima spetgan en il Tessin ils campiunadis d’Europa e la fin d'avust suondan cun ils campiunadis mundials en la Val di Sole en l’Italia il punct culminant da l’onn. Tut questas cursas è Chiara Solèr però sfurzada da persequitar be a l’ur.
Il mument vegn la giuvna mountainbikera lumneziana da 21 onns franada da blessuras ed er in zic da problems mentals. La stagiun aveva gia cumenzà mal per Chiara Solèr. Gia en l’emprima cursa da la cuppa mundiala a Nove Mesto en Tschechia è ella cupitgada. Suenter il 24avel plaz a Leogang en l’Austria ed il 36avla plaz a la cursa da chasa a Lai ha ella stuì magunar la proxima frida. Durant la cursa a La Thuile en l’Italia è Solèr danovamain cupitgada ed ha stuì ceder. Tar quest crash ha ella cunzunt gì ina squassada dal tscharvè. Bun in’emna ha ella passentà quasi mo en letg. Uss èn trais emnas passadas, mo questa blessura na lubescha anc betg da far cursas. Il mument trenescha Chiara Solèr be pauc e be sin via.
Igl è ina stagiun d’emblidar, dentant mintga profi ha ina giada en sia carriera ina tala fasa.
I na saja betg in simpel temp, mo i valia da guardar enavant e far il meglier ord la situaziun, di Chiara Solèr ch’è en sia terza stagiun tar las U23 e che fa part al team dals Thömus Youngstars. Fitg impurtant en questa situaziun saja er il sustegn da la famiglia. E leda è ella era da pudair ir mintgamai ils avantmezdis a lavurar tar la chanzlia communala a Vella per uschia er vegnir in zic sin auters patratgs.
La testa na vul betg propi
Gia avant la squassada dal tscharvè ha Chiara Solèr cumbattì cunter problems mentals. Ella sentia sezza ch’ella na saja betg tuttina ferma mentalmain sco anc durant las stagiuns passadas. Per era schliar quest nuf saja ussa propi impurtant da reflectar tut. Lura giauda ella il mument er dad ir cun velo suletta, tadlar musica e scriver diari - metodas che gidian fitg. Il sustegn ha Chiara Solèr er da ses trenaders, cunzunt da sia trenadra mentala.
La finamira è ussa dad anc pudair ir a la partenza a la cursa da la cuppa mundiala mez avust a Les Gets en Frantscha, pli probabel sia davosa cursa sin quest livel en questa stagiun. In bun resultat fiss cunzunt bun per la morala, ma er bun per pudair segirar en l’avegnir in plaz en il team da Thömus. Actualmain na po Chiara Solèr anc betg dir, coi va vinavant la proxima stagiun 2027.