Dapi set onns è Benny Wunderer il scheftrenader dal CDH Engiadina. El s’engascha ensemen cun numerus trenaders da milissa en tut las squadras dal CDH Engiadina. Dals pli pitschens che van anc en la scola da hockey, fin ils creschids da l’emprima equipa che dattan il campiunadi en segunda liga. Gia avant dus onns han ins constatà en il CDH Engiadina che la lavur per in unic trenader professiunal daventa memia bler. Perquai han ins quella giada engaschà ina trenadra d’assistenza per il CDH Engiadina. Ma Evelyn Maderegger è stada be ina stagiun. Uss duai Lubos Konak sustegnair il scheftrenader Benny Wunderer.
Experientscha en la Tschechia, dentant er en la regiun
Lubos Konak era sez giugader da hockey en la Tschechia. Durant sia carriera sco trenader da hockey ha el trenà en emprima lingia equipas da la Tschechia. Dentant era per exempel Illnau-Effretikon, nua ch’el è stà responsabel per la squadra sut 20 onns. Ina colliaziun cun l’Engiadina Bassa ha Lubos Konak tras il champ da hockey ch’ha lieu gia divers onns en la halla da glatsch da Gurlaina a Scuol. Uschia è Konak era vegnì en contact cun il CDH Engiadina. Ed uschia a l’engaschament sco trenader da l’emprima squadra, e da la squadra da las dunnas dal CDH Engiadina che dat il campiunadi en la liga naziunala C.
Ir vinavant la via ch'il CDH Engiadina va
Per ils responsabels dal CDH Engiadina èsi impurtant d'avair sper Benny Wunderer anc in ulteriur trenader professiunal a Scuol. Els dus duessan parter si la lavur. Benny Wunderer duai er en il futur s’occupar dals pitschens e dals juniors. Lubos Konak surpiglia la batgetta da l’emprima squadra e da la squadra da las dunnas. Uschia pon tuts profitar maximal e garantir per ina buna e largia spierta da hockey en Engiadina Bassa.
