Seraina Boner, la partenaria da Toni Livers ch’ha stuì dar forfait per questa cursa populara da passlung pervia d’ina blessura, ha gudagnà avant la spezialista da mountainbike Anina Hutter da Trimmis, e la Tudestga Sigrid Mutscheller. Persvadì ha era l’anteriura biatleta Selina Gasparin ch’è vegnida 5avla. Tar ils umens è la decisiun crudada en in sprint final. En quel ha la finala Silvan Durrer dal chantun Sviz battì piz a cup Sven Buholzer da la Svizra Centrala ed il Bernais Tim Marti.
Nino Schurter enavos a la partenza
Persvadì han era plirs indigens, tranter els Kevin Marc Camathias da Sagogn ch’ha terminà la cursa sin il 5avel plaz. Ses frar Janic Camathias è daventà 22avel. Plinavant èn er stads a la partenza plirs prominents sco per exempel Nino Schurter. L’anteriur profi da mountainbike è vegnì 15avel en sia emprima cursa dapi ch’el ha terminà sia carriera da mountainbike il settember a Lai. Enstagl da far uss il viadi en l’Africa dal Sid per sa preparar sin la stagiun da bike – stat Nino Schurter ch’è vegnì dacurt per la segunda giada bab, per l’emprima giada dapi blers onns a chasa. Per l’ina per esser tar sia famiglia e per l’autra per trenar sin sia premiera al Maraton da skis engiadinais.
Rangaziun Planoiras 2026
Auters curriders sco Andrin Beeli da Sagogn han nizzegià questa cursa da passlung sco bun trenament per la stagiun da bike. Andrin Beeli parta il mars al Cape Epic en l’Africa dal Sid.
Plan B – rundas en l’Arena da biatlon
Tut en tut èn stadas a la partenza radund 260 curridras e curriders al Planoiras 2026. Quel ha ord mancanza da naiv stuì vegnir organisà sulet en l’Arena da biatlon a Lantsch. Enstagl da currer da Lantsch a Parpan ed enavos a Lai han curridras e curriders stuì currer quatter rundas a bun tschintg kilometers. Per la gronda part sin la loipa da la cuppa mundiala da biatlon, ina runda pulitamain pretensiusa. Ils pli sperts han duvrà gnanc in’ura per ils bun 20 kilometers. Ils 40 participants e participantas dal Planoirino, la cursa curta, han gì da currer duas rundas.
