In grond merit da quest success tutga er a Beat Tschuor da Sursaissa, il schef-trenader da las skiunzas svizras ch’han per l’emprima giada gudagnà il classament da las dunnas dapi la stagiun 1994/95. Cun Lara Gut-Behrami (2.) e Michelle Gisin (3.) han duas Svizras schizunt fatg il pass sin il podest dal classament general. Blers puncts han er gudagnà Corinne Suter e Wendy Holdener.
Nus avain gì in enorm privilegi che nus avain astgà far noss sport durant quest enviern.
Beat Tschuor, ch’è stà occupà la davosa stagiun principalmain cun tut quai ch’ha pertutgà il tema corona, sa legra uss sin in temp in zic pli ruassaivel a chasa cun la famiglia. Ses uffants haja el vesì la davosa giada da Nadal. Sper il temp cun la famiglia vegnia el dentant franc er anc a giudair dad ir sez sin pista a Sursaissa, quai che vegnia a la curta durant la stagiun da la cuppa mundiala.
