Swiss Epic 2025 - Argient da mixt va a Mustér

Per l’emprima giada gudogna il duo svizzer/talian Casey South e Fabian Rabensteiner il Swiss Epic. Il duo ha salvà l’avantatg en l’arrivada e po festivar il success dad esser stà durant in’emna l’equipa la pli cumpetitiva dal Swiss Epic. Tar las dunnas va quella onur a las grondas favuritas Vera Looser da la Namibia ensemen cun Alexis Skarda dals Stadis Units.

Andrin Beeli da Sagogn terminescha il Swiss Epic ensemen cun ses partenari Davide Foccoli sin plazza tschintg dal classament general. L’indigen Fadri Barandun ha durant quest Swiss Epic en sia patria l’Engiadina Auta pers bler temp e terminescha la cursa cun ses partenari Micha Klötzli sin plazza 18.

Per il Grischun hai anc dà ina plazza da podest en la categoria maschadada, nua che Sascha Deplazes ed Ursina Condrau da Mustér en vegnids segunds. Il segund onn nua ch'il duo fa part al Swiss Epic è el gia sin il podest.

Era per il team RTR cun Andreas Wieland e Cornelia Schwarzentruber è l’aventura Swiss Epic 2025 a fin. Er els han dumagnà las tschintg etappas cun 340 kilometers e 12’000 meters d’ascensiun. Durant l’ultima etappà ha quai anc dà per l’emprima giada ina plazza da top ten. Andreas Wieland e Cornelia Schwarzentruber èn arrivads sco 9avels. En il classament general fan els uschia in pass enavant sin plazza 11.

Quarta etappa porta granella

La quarta etappa ha cumenzà sut tschiel cler a La Punt, ma il tschiel è daventà pli stgir sin viadi vers Tavau. Ils umens pli svelts han per gronda part evità la plievgia sin il pass da Scaletta. Las dunnas èn vegnidas bletschas e las gruppas pli plaunas han schizunt stuì far pausa pervi d’in stemprà.

Per motivs da segirezza è il toc tras la Val Trupchun vegnida stritgada. Uschia è l’etappa vegnida scursanida da 64 a 52 kilometers. Il pass da Scaletta è restà il punct central – cun 2’606 meters sur mar e 33 kilometers suenter la partenza. Da là han ils participants pudì ir en descensiun fin a Tavau.

Impressiuns da la quarta etappa

Terza etappa

Venderdi, ils 15 d’avust, han las equipas absolvì ina etappa da 55 kilometers dal Pass dal Bernina fin a La Punt. La ruta era per gronda part en descensiun – da 2’305 sin 1’683 meters sur mar. Tuttina n’era quai betg in di simpel: Ils atlets e las atletas han gì da far descensiuns difficilas ed ascensiuns intensivas.

Impressiuns da la terza etappa

La segunda etappa è passada

Er il duo lumnezian, Norbert e Ronny Cavegn, sa participeschan al Swiss Epic 2025. Aspect interessant: els dus san far il congual cun la mamma da tut las cursas da mountainbike cun pliras etappas, il Cape Epic. La cursa legendara en l'Africa dal Sid, nua ch'els èn duas giadas as participads.

Andrin Beeli il pli svelt Grischun suenter 1. etappa

Il pli svelt indigen suenter l'emprima etappa è Andrin Beeli da Sagogn. El è gia per la 7avla giada a la partenza dal Swiss Epic, quest onn cun Davide Foccoli da l’Italia. Els han terminà l'emprima etappa sco 5avels, cun 5 minutas retard sin ils pli svelts – il Talian Fabian Rabensteiner che parta cun il Svizzer Casey South.

Quai è il Swiss Epic

Ils trajects dal Swiss Epic midan mintga onn. Els pretendan condiziun, perseveranza ed inschign. En teams da dus han las participantas ed ils participants la pussaivladad da sa miserar di per di – tant profis sco er amaturas ed amaturs. Las atletas ed ils atlets pon sa legrar sin pass spectaculars flowtrails iconics, parcs da bike cun bler action e valladas intactas.

Las proximas etappas sut la marella

Cursa da cross-country internaziunala

Teams da l'entir mund pelegrineschan per l'aventura da mountainbike en il Grischun. Dasper la cursa vala l'ospitalitad svizra, il parter las experientschas sco era la pussaivladad da crear memorias sco arguments principals da sa participar.

Il Swiss Epic fa part da la seria da cursas globala Epic Series e porscha 15 plazzas da qualificaziun per la cursa legendara Absa Cape Epic en l'Africa dal Sid.

Impressiuns dal Swiss Epic

Rapportaziun da RTR dal Swiss Epic 2024

Resultats e rangaziun

Ils highlights per guardar suenter