Giulia Tanno da Lai n’ha betg pudì confermar a Laax ses buns resultats da la stagiun fin qua. En la qualificaziun ch’ha direct cumenzà cun il mezfinal è Giulia Tanno vegnida be 13avla ed ha uschia manchentà il final da la dumengia cun las meglras otg. A la cuppa mundiala la fin november a Stubai en l’Austria era la Grischuna da 25 onns anc vegnida 5avla. Gia avant in onn avev’ella dentant sco 15avla manchentà il final al Laax Open. Per Tanno era la concurrenza dal 2023 dentant stada sia emprima suenter ina lunga pausa da blessura.
Gremaud e Hoefflin en il final
Dumagnà la qualificaziun per il final han percunter las duas svizras Mathilde Gremaud e Sarah Hoefflin. Gremaud, la campiunessa olimpica da Peking, ha mussà il segund meglier run. In meglier resultat ha sulet la chinaisa Ailing Eileen Gu mussà. Hoefflin ch’era vegnida quarta tar la premiera al Laax Open avant in onn, è vegnida quarta en la qualificaziun.
Las finalistas:
- Eileen GU (CHN) 68,73
- Mathilde Gremaud (SUI) 67,50
- Ruby Star Andrews (NZL) 64,51
- Sarah Hoefflin (SUI) 60,20
- Jay Riccomini (USA) 56,75
- Mengting Liu (CHN) 54,25
- Rell Harwood (USA) 54,13
- Tess Ledeux (FRA) 52,75
Andri Ragettli suveran en il mezfinal
En la concurrenza da freeski slopestyle dals umens cumbattan il venderdi trais Grischuns per in plaz en il final. Dasper il favurit e defensur dal titel a Laax, Andri Ragettli da Flem, han er Gian Andri Bolinger da Zuoz sco er Kim Gubser da Tavau dumagnà la qualificaziun per il mezfinal. Plinavant han dumagnà il pass en il mezfinal Fabian Bösch, Colin Wili e Thierry Willi.
Andri Ragettli, il mattadur local e victur da l'ediziun 2023, ha persvadì cun il segund meglier run da tuts en la qualificaziun.
Ils finals da slopestyle dals umens e da las dunnas, mintgamai cun ils megliers otg, èn la dumengia tranter las 13:15 e las 14:45 uras.
