Nadja Kälin, duas medaglias olimpicas hai dà ed era anc scrit istorgia da sport, realisais Vus quai?
Nadja Kälin: Jau crai, in zic realisà hai jau schont quai. Però pens jau era ch'i dovra anc in pau temp enfin ch'jau realisesch lura dal tut.
Avant in pèr dis avais scrit istorgia: Duas medaglias olimpicas - ina da quellas sco suletta passlunghista svizra en ina concurrenza singula. Co èn quels ultims dis stads per Vus?
Igl è tut era stà in pau stressant. La cursa è stada la dumengia, lura essan idas direct a la festa finala - atgnamain avevan vulì ir a chasa. Lura glindesdi essan turnadas a chasa. Mardi è lura stà plitost il di da lavar vestgadira, e lura sa chapescha era respunder messadis.
Hai probabel dà blers messadis, navair?
Gea, lez bain. Jau n'hai crai anc mai survegnì tants messadis sco ussa.
Ed ils sponsurs èn era s'annunziads? Ussa che Vus avais l'attenziun gronda?
Gea, mes sponsurs che m'han sustegnì fin ussa èn s'annunziads. Però novs sponsurs n'èn betg s'annunziads.
I na dat nagina festa classica, nua che tut San Murezzan per exempel beneventass Vus. Proxima fin d'emna vai gia vinavant. N'è quai betg donn da betg avair il temp da far ina festa?
Natiralmain fissi bel dad ussa era pudair giudair in pau, era ensemen cun la famiglia. Igl è però era ok ch'i va ussa vinavant, ch'ins resta liaint là. L'avrigl datti lura forsa insatge.
Vus essa viagiada als gieus olimpics cun la speranza sin in diplom olimpic – pia aifer las emprimas 8. E la finala hai dà duas medaglias, quai che betg tuts avessan spetgà. Pudais retrospectiv declerar quai ch'è capità?
Propi declerar dal tuttafatg na pon ins gea mai. Jau hai gea mussà gia en il skiatlon che jau sun bun en furma e sun vegnida sin il plaz 4. Là hai jau savì ch'i va bain. En il sprint da team ensemen cun la Nadine (Fähndrich, la red.) – ella è era stada uschè ferma – avain lura savì ch'i fiss pussaivel. Là hai lura era dà dapli squitsch da lura era furnir. E lura en ils 50 kilometers hai jau lura pudì currer senza grond squitsch, la medaglia d'argient aveva jau gia ed uschia era in resultat top. E ch'i va la finala lur si uschè bain, per lez sto tut ir bain ensemen. Jau hai era gì super skis quel di. Igl è propi bel ch'igl è ì si uschè bain.
Ina part dal success è pia stà da pudair ir senza squitsch a questa concurrenza. Quai mida ussa tut tenor. Suenter las medaglias vegnan il squitsch e las spetgas a crescher. Co è quai?
Logic. Meglier ch'ins va, e pli grondas èn las spetgas. Las pli grondas spetgas han ins crai jau adina vers sasez. Dad ademplir questas è crai il pli difficil. Jau prov simplamain da far il meglier pussaivel. Bler dapli na poss jau uschè u uschia betg far.
Ussa vai la fin d'emna gist vinavant la fin d'emna en Svezia cun la cuppa mundiala. Co va quai da midar dals gieus olimpics cun medaglias puspè enavos en la cuppa mundiala?
Il «co» è ina buna dumonda. Simplamain far vinavant. Nus partin damaun gia baud e jau sun uss stada dus dis a chasa a pachetar ora, lavar resti, e puspè pachetar la valischa. Ed i va simplamain adina vinavant, simplamain star londervi e far vinavant, lura va quai schon!