Dapi la fin da la stagiun 2023/2024 cumbatta Sandro Simonet sin agens custs e sut atgna reschia per turnar enavos en la cuppa mundiala da skis. Il spezialist da slalom na fa dapi passa in onn betg pli part al cader da Swiss Ski. Betg ina simpla situaziun, però nagin motiv da chalar. Sandro Simonet è da buna speranza ch’el po turnar enavos ed er il fieu brischi anc adina per quest sport.
Il skiunz surmiran sto il mument finanziar ed organisar tut sez. La stagiun custi ad el mintgamai 70 fin 80’000 francs. El è perquai avisà sin grond sustegn, cunzunt da ses sponsurs. Sustegn survegn Sandro Simonet er da Michi Bont, ses trenader da cundiziun e ses mentur persunal.
Nov material e novas vias per trenar la part mentala
Plinavant ha Sandro Simonet midà l’onn passà il material. El haja perquai er duvrà bun in onn per s’endisar vid ils novs skis. Uss sa sentia el dentant bain. Il proxim pass fissan ils buns resultats. Er pertutgant il trenament mental va Simonet novas vias. Dapi la primavaira visita el regularmain il tschaler da sal a Cuira. Là passenta el mintgamai in’ura en ina bognera cun aua da sal che cuntegn er in mantun magnesium. Quai «floating» gidi cunzunt da sa calmar e da vegnir surengiu. El sa senti mintgamai fitg bain suenter in tal process.
Cumpareglià cun l’onn passà haja el pudì far in dus pass enavant. Bunas premissas per puspè vegnir risguardà da Swiss Ski per uschia er puspè pudair prender part a cursas sin il pli aut livel. Mo Sandro Simonet siemia dapli. Ina gronda finamira fissi era dad esser tranter ils megliers quatter spezialists da slalom en Svizra per uschia pudair prender part als proxims gieus olimpics il favrer 2026 a Cortina.