La golia Seraina Friedli terminescha sia carriera da ballape. La passiun per il ballape da professiun na saja betg pli uschè ferma, argumentescha la Grischuna da 30 onns. Quai na saja dentant betg stada ina decisiun dad in di sin l’auter, mabain in process sur pliras emnas, uschia l'Engiadinaisa.
Gia la primavaira aveva ella prendì per l’emprima giada in zic distanza dal ballape e da la naziunala svizra suenter ch’ella è sa sentida stancla. Ella ha lura passentà duas emnas en ils culms, en la natira per tancar nova energia. Mo quai saja stà il cumenzament da la fin da sia carriera, ed in segn che quai capitel è a fin constatescha Friedli bun in mez onn pli tard. Uss vul la sportista oriunda da la Punt Chamues-ch sa concentrà sin sia vita professiunala.
Da mia carriera restan las statisticas cun tut ils titels e success, mo anc pli impurtant èn tut ils inscunters e la amicizias durant quels onns.
Seraina Friedli ha lantschà sia carriera il 2005 tar ils Lusitanos de Samedan. Suenter duas stagiuns tar il FC Tusaun-Cazas ha ella midà il 2012 en la pli auta liga svizra tar il FC Turitg. Cun il FCZ ha ella er festivà ses pli gronds success da la carriera e vegnida cun quest club sis giadas campiunessa svizra e gudagnà quatter giadas la cuppa svizra. Vitiers ha ella er pudì giugar cun Turitg en la Champions League. Tranter il 2018 ed il 2022 ha ella er giugà per ils Young Boys da Berna e per il FC Aarau. Il 2020 ha Friedli fatg l'emprima giada il pass sur cunfins e giugà durant ina stagiun per Florentia San Gimignano en l'Italia. Dapi questa stagiun è ella stada sut contract tar il RSC Anderlecht en la pli auta liga da la Belgia.
Golia da l'equipa naziunala
Grazia a sias bunas prestaziuns è Seraina Friedli er vegnida clamada en l'equipa naziunala svizra. Ses debut en il tricot da la naziunala ha ella pudì dar il 2016 en in gieu da qualificaziun per il campiunadi d'Europa il 2017 nua ch'ella è però vegnida nominada be sco golia da reserva. Er tar il campiunadi d'Europa il 2022 sco als davos campiunadis mundials la stad passada en la Nova Zelanda ed en l'Australia ha Friedli mintgamai stuì sa cuntentar cun la rolla da reserva davos Gaëlle Thalmann. Tut en tut ha Seraina Friedli giugà durant set onns 10 giadas per l'equipa naziunala svizra.
Dasper sia carriera sco profi ballapedista ha Seraina Friedli fatg a Berna in studi da psicologia e sport ed ella è stada l'emprima giugadra da ballape en Svizra ch'ha absolvì il 2018 la scola da recrut da sport d'elita.
