Il Svizzer Loic Meillard n'ha betg pudì nizzegiar ses avantatg or da l'emprim percurs. Tuttina mussa el ina prestaziun ferma – malgrà ch'i ha navì e la pista era loma. Meillard sa mussa cuntent cun il segund rang, malgrà ch'i n'ha puspè betg tanschì da gudagnar ses emprim slalom en la cuppa mundiala. Ed al Romand na grategi uschia era betg da far l'emprima victoria svizra en il slalom da Wengen dapi 36 onns.
Sco gia en il Super-G ed en la rapida triumfescha è en il slalom in Norvegiais. Per Henrik Kristoffersen èsi la 30avla en la cuppa mundiala. Il podest vegn cumplettà cun in ulteriur Norvegiais. Lucas Braathen, il victur da l'onn passà che ha triumfà avant in'emna en il slalom dad Adelboden.
Il podest
- Henrik Kristoffersen (NOR), 1:51:18 minutas
- Loic Meillard, +0,20 secundas
- Lucas Braathen (NOR), +0,49 s
Cun sia victoria è Henrik Kristoffersen da nov a la testa dil classament da disciplina. Cun 320 puncts ha el in avantatg da 10 puncts sin ses cumpatriot Lucas Braathen. Sin il terz plaz è l'Austriac Manuel Feller cun 241 puncts. I suondan Daniel Yule (234 puncts) e Loic Meillard (222 puncts).
Emprims puncts per Sandro Simonet dapi 1 onn
Grond levgiament per il Surmiran Sandro Simonet: Ses ultim resultat en la cuppa mundiala datescha dal schaner 2022 cun ses 21 plaz en il slalom da Schladming. Il slalom da Wengen terminescha Sandro Simonet sco 16avel. Suenter l'emprim percurs era el sin plaz 28. Cun Ramon Zenhäusern sco 9avel, è in ulteriur Svizzer en ils top 10. En tut èn 6 Svizzers classads en l'ultima cursa da la festa da skis da Wengen.
- 9. Ramon Zenhäusern, + 2,86 s
- 11. Daniel Yule, + 3,19
- 16. Sandro Simonet, +4,10
- 17. Marc Rochat, +4,18
- 25. Luca Aerni, +5,06
Tanguy Nef, Fadri Janutin e Noel von Grünigen èn crudads or e n'han betg cuntanschì il segund percurs. Cun la naiv loma e pli tard cun la nauscha vista han blers skiunzs gì da cumbatter. 30 da total 71 skiunzs èn crudads or en l'emprim percurs.
Las proximas cursas dals umens han lieu a Kitzbühl. Proxim venderdi e la sonda datti ina cursa rapida, la dumengia suonda in slalom.
