Crimi da tschientavels
Las emprimas trais skiunzas èn classadas entaifer be 9 tschientavels. Il cletg dals tschientavels ha per ina giada la Svizra gì, meglier detg Lara Gut-Behrami. La Tessinaisa, anc terza suenter l'emprim percurs, ha la finala distanzià l'Americana Mikaela Shiffrin per be dus tschientavels ed uschia gudagnà sia terza medaglia a quests campiunadis mundials a Cortina d'Ampezzo, quai suenter la medaglia dad aur en il super-g e la medaglia da bronz en la cursa rapida. Tut en tut è quai gia l'otgavla medaglia per Gut-Behrami a campiunadis mundials.
Cumplettà il podest sco terza ha l'Austriaca Katharina Liensberger ch'ha pers be 9 tschientavels sin Lara Gut-Behrami. Per la spezialista da slalom èsi la segunda medaglia dad aur. Avant dus dis ha ella gudagnà ensemen cun la Taliana Marta Bassino il slalom parallel.
Rangaziun slalom gigant dunnas:
- 1. Lara Gut-Behrami (SUI), 2:30.66
- 2. Mikaela Shiffrin (USA), + 0,02
- 3. Katharina Liensberger (AUT), + 0,09
- 4. Alice Robinson (NZL), + 0,73
- 5. Ramona Siebenhofer (AUT), + 1,26
- 6. Maryna Gasienica Daniel (POL), + 1,53
- 8. Wendy Holdener (SUI), + 1,68
- 11. Michelle Gisin (SUI), + 1,81
- 18. Corinne Suter, + 4,14
Sbagl custa a Gisin ina medaglia
Stuì sutterrar il siemi da gudagnar in'ulteriura medaglia ha Michelle Gisin, quai suenter in grond sbagl en il segund percurs. Suenter l'emprim percurs era Gisin anc 5avla, la finala ha ella stuì sa cuntentar cun il 11avel plaz. Perencunter ha Wendy Holdener pudì mussar ina reacziun en il segund percurs ed uschia anc far in pass enavant dal 13avel sin l'otgavel plaz. Corinne Suter terminescha il slalom gigant sin il plaz 18.
Trumpada per Bassino e Vlhova
Ina terrada han Marta Bassino e Petro Vlhova stuì magunar. La Taliana e la Slovaca che valevan sco duas da las grondas favuritas han stuì sa cuntentar cun ils plazs 12 (Vlhova) e 13 (Bassino). Principal per Bassino èsi ina trumpada a ses campiunadis mundials da chasa. En questa stagiun avev'ella gudagnà quatter da sis slaloms gigants.
Emprima medaglia dad aur dapi 20 onns
Lara Gut-Behrami ha gudagnà l'emprima medaglia dad aur per la Svizra en questa disciplina slalom gigant dapi 20 onns. Il 2001 aveva Sonja Nef triumfà al campiunadi mundial a St. Anton en l'Austria.
Uschia vai vinavant
Il venderdi stat sin il program il slalom gigant dals umens (10:00/13:30 uras) nua ch'ils Svizzers audan er tranter ils candidats da medaglia, oravant tut Marco Odermatt. La fin d'emna vegnan lura surdadas las davosas medaglias. La sonda è il slalom da las dunnas (10:00/13:30 uras), la dumengia il slalom dals umens (10:00/13:30 uras).