Il podest:
- Lara Gut-Berhrami (1:25,51)
- Corinne Suter (+0,34)
- Mikaela Shiffrin (+0,47)
Il start en ils campiunadis mundials da Cortina d'Ampezzo è gartegià tar las Svizras. Lara Gut-Behrami e Corinne Suter van per las emprimas duas medaglias. Terza è vegnida l'Americana Mikaela Shiffrin.
Las duas ulteriuras Svizras Michelle Gisin e Priska Nufer han dumagnà sin las plazzas 8 e 13.
Lara Gut-Behrami è vegnida a frida cun il squitsch
Las quatter ultimas cursas en il super-G aveva la Tessinaisa gudagnà en la cuppa mundiala. Uschia è Lara Gut-Behrami stada oz la gronda favurita. Da tuttas varts vegniva scrit e ditg che tut auter ch'ina medaglia d'aur per ella, fiss ina gronda trumpada.
Cun ina cursa suverana da sisum fin giudem ha Lara Gut-Behrami gudagnà meritadamain sia emprima medaglia d'aur a campiunadis mundials.
Shiffrin fiss stada pli sperta...
L'Americana è stda la defensura dal titel, n'era dentant ida betg ina unica cursa en questa disciplina questa stagiun. Quai fin oz.
Tochen tar l'ultim temp intermediar era Shiffrin cun grond avantatg a la testa dal classament. In grond sbagl, nua ch'ella ha pers la lingia ideala, ha dentant custà radund 1 secunda. Tuttina hai anc tanschì per la medaglia da bronz.
