La Svizra ha in'ulteriura campiunessa olimpica. Mathilde Gremaud, la Friburgaisa da 22 onns, ha gudagnà aur grazia ad in sigl extraordinari en il segund run. Segunda è vegnida la Chinaisa Eileen Gu, terza Kelly Sildaru da l'Estonia.
il podest:
- Mathilde Gremaud SUI
- Eileen Gu CHI
- Kelly Sildaru EST
Il di avant aveva Gremaud dumagnà be per il nair da l'ungla la qualificaziun sco 12avla da 12 finalistas. Tar la reprisa ha la skiunza però mussà ina reacziun ed è vegnida onurada dals Judges cun 86,56 puncts.
Segunda medaglia per Gremaud
Mathilde Gremaud daventa uschia successura da sia collega da team Sarah Höfflin ch'aveva triumfà il 2018. A Pyeongchang era Gremaud ida per argient davos Höfflin. Per Gremaud èsi uschia la segunda medaglia a Peking. En il Big Air è ella gia ida ils 8 da favrer per bronz.
