La gala dals Sports Awards, en il studio da televisiuna a Turitg, fiss atgnamain stada ils 4 da schaner da quest onn. Pervida la catastrofa a Crans Montana ha la SRG SSR dentant decis da spustar ella sin la fin da mars.
Sportista e sportist da l'onn
Ditaji Kambundji e Marco Odermatt èn la sportista ed il sportist da l'onn 2025. La curridra d'obstachels bernaisa ed il skiunz da la Sutsilvania èn vegnids undrads a chaschun dals Sports Awards 2025 a Turitg.
Per Marco Odermatt, che ha survegnì dapli che 32 pertschient da las vuschs èsi la 5avla giada en seria ch'el gudogna il Sport Award sco meglier sportist. Odermatt ha gudagnà cunter il nudader Noe Ponti e ses collega da skis Franjo von Allmen.
Ditaji Kambundji ha survegnì dapli che 44 pertschient da las vuschs. Ella vegn undrada per ina prestaziun da pioniera. Sco emprima sportista svizra d'atletica leva insumma, ha ella gudagnà aur tar in campiunadi munidal en il liber, quai sur 100 meters obstachels. Kambundji ha gudagnà cunter la ciclista Marlen Reusser e la skiunza Camile Rast.
MVP da l'onn: La ballapedista da la squadra naziunala Géraldine Reuteler
Reuteler è stada la fatscha da la squadra naziunala da ballape da las dunnas tar il campiunadi europeic la stad passada. Sin la via enfin en il quartfinal, è la giugadra da 26 onns da la Sutsilvania vegnida elegida da la UEFA en tut ils trais gieus da gruppa sco «meglra giugadra dal gieu». La giugadra offensiva dad Eintracht Frankfurt è l'emprima dunna che ha gudagnà en questa categoria, ch'ins ha introducì il 2019. Cun la categoria MVP vegn undrada la sportista u il sportist il pli custaivel d'in team.
Team da l'onn: La squadra naziunala da hockey dals umens
La squadra naziunala da hockey dals umens ha gudagnà al campiunadi mundial en Svezia la medaglia d'argient. Il final ha il team cun il trenader Patrick Fischer pers mo fitg stretg cunter ils Stadis Unids cun 0:1 suenter prolungaziun. Per la squadra naziunala da hockey dals umens èsi la quarta distincziun da quest gener, suenter il 1986, 2013 ed il 2018. Ultra da quai va era il Sport Award en la categoria trenader da l'onn danovamain a Patrick Fischer, quai suenter il 2018 ed il 2024, quai è in record en questa categoria. La fin da matg, suenter il campiunadi mundial a chasa, sa retira Patrick Fischer, che ha 50 onns, sco trenader.