La stagiun da skis ch'è gist ida a fin era ina stagiun excepziunala. La naziun da skis svizra è e resta la meglra dal mund. Marco Odermatt e Lara Gut-Behrami han gudagnà las cullas da cristal grondas per las victorias dal classament general. Vitiers vegnan tar Odermatt anc las cullas en las disciplinas cursa rapida, super-G e slalom gigant, e tar Lara Gut-Behrami anc las cullas en las disciplinas super-G e slalom gigant. Set da totalmain diesch cullas da cristal han els dus gudagnà.
Fermas prestaziuns er da skiunzas e skiunz grischuns
Spera las fermas prestaziuns d'Odermatt e Gut-Behrami han era skiunzas e skiunzs grischuns persvas. Surtut la campiunessa mundiala da la cursa rapida Jasmine Flury. Ella ha gudagnà durant l’enviern passà per l’emprima giada ina cursa rapida da la cuppa mundiala. A Val d’Isère era ella la pli sperta. Ed a Crans Montana è ella vegnida segunda. Persvadì han er Stefan Rogentin cun sia victoria dal super-G da Saalbach e Thomas Tumler ch’è vegni terz dal slalom gigant a Saalbach.
Stagiun constanta per Gino Caviezel e Sandro Simonet a la tschertga da constanza
Gugent avess Gino Caviezel gudagnà sia emprima cursa da la cuppa mundiala. Ses meglier resultat è ina segunda plazza. Caviezel ha bain mussà ina stagiun constanta, per la victoria n’ha ha quai dentant betg bastà. Ina tschintgavla plazza era il meglier resultat. Tut autra la stagiun per Sandro Simonet. Il skiunz da Casti emprova anc adina da chattar la constanza, durant questa stagiun n'è quai dentant betg gartegià. Quatter giadas è el ì a la partenza dad ina cursa da la cuppa mundiala, duas giadas e Simonet crudà ora e duas giadas n’ha el betg savì sa qualifitgar per la segunda cursa.
Stephanie Jenal e Livio Simonet cun segn d’exclamaziun
La skiunza da Samignun Stephanie Jenal ha cumenzà bain la stagiun cun ina 12avla plazza ad Altenmarkt. Blessuras han dentant lura franà la skiunza grischuna. E per in segn d’exclamaziun ha er procurà Livio Simonet. Ses meglier resultat era ina 14avla plazza a Palisades Tahoe en ils Stadis Unids.