Dals 16 – 22 da fanadur sa mesiran radund 4’500 sportistas e sportist populars a l’emna da cursas d’orientaziun en la regiun da Flem e Laax.
Flem Laax resta il Mecca dal sport da cursa d’orientaziun. Suenter che las atletas ed ils atlets d’elita han cumbattì per las medaglias als campiunadis mundials datti durant in’emna cursas per il sport da massa. Tut en tut èn bun 4’500 persunas tranter 8 ed 88 onns a la partenza, sportists or da bun 40 naziuns.
La terza etappa da mardi, ils 18-07 ha lieu sin il Vorab. RTR accumpogna durant quest di ils participants da quest Swiss Orienteering Week ch’i dat dapi il 1996 e che vegn organisà mintga 2-3 onns. L’etappa sin il Vorab, a l’ur dal glatscher dal Vorab sin in’autezza da passa 2'500 meters sur mar, vala sco la «coola etappa» da quest’emna da cursa.
Da la partida è er Sophie Lüscher da l'Argovia. Ad ella plascha surtut che mintg'etappa da la cursa è puspè insatge auter. In di curran las atletas ed ils atlets tras ils guauds da Flem ed in auter sur la crappa enturn il glatscher dal Vorab.
Cun var 4'500 curridras e curriders datti er blera lavur per volunaris ed organisaturs. Il president dal comié d'organisaziun Marcel Schiess è cuntent cun l'eveniment. Las atletas ed ils atlets hajan plaschair da la cursa, quai saja il pli impurtant.
