Cuira sco era Malans èn Meccas da l'unihockey svizzer. Alligator Malans ha gudagnà tschintg giadas il titel da campiun svizzer, Rot-Weiss Cuira è cun 12 titels anc adina campiun svizzer da record. Dals temps glorius hai dà en il Grischun perfin trais clubs en la liga naziunala A. Sper ils dus clubs numnads hai anc dà Torpedo Cuira. Il 2004 han ils dus clubs da Cuira lura dentant fusiunà tar il club Cuira Unihockey.
A la cua da la tabella
Il sguard sin la tabella da la liga naziunala A fa actualmain mal a mintga fan da l'unihockey grischun. Cuira ha mo gudagnà 4 da 20 gieus ed è sin plazza 12 ed uschia sin l'ultim plaz. Duas rundas avant la fin da la qualificaziun èsi cler che l'equipa da la chapitala sto dar playouts per restar en la liga naziunala A. In zic meglier guardi ora tar ils Alligator Malans – rangà sin plazza 10 han els mo in punct retard sin ina plazza da playoff.
Per il president da Cuira Unihockey ed anteriur goli dal club, Curdin Furrer, datti plirs motivs daco ch'il Grischun n'è betg pli il numer 1 en l'unihockey dals umens. I saja cleramain vegnì fatg memia pauc ils ultims onns. Ed el na manegia betg mo ils giugaders, mabain er ils funcziunaris. I s'enclegeva da sasez ch'ins cuntanschia ils playoffs e ch'i funcziuna lura bain insaco.
Jau hai il sentiment che nus vivin dal passà.
Dal passà na pon ins cumprar nagut. Da gliez è Curdin Furrer conscient. I stoppia sa midar insatge per purtar enavos l'unihockey grischun a la testa. La concurrenza, spezialmain dals chantuns Berna e Turitg ha numnadamain investì bler ils ultims onns en il sport. Er finanzialmain na tegnan ils clubs dal Grischun betg pli pitg a clubs sco Floorball Köniz u GC Turitg.
Cler è ch'i sto capitar insatge
Quitads fa la situaziun actuala al president da la federaziun grischuna, Gion Caviezel. La politica da clubs na saja betg chaussa da la federaziun. Il focus dad els saja da sustegnair ils juniors sin lur via. Ma tuttina fa el la dumonda sche dus clubs grischuns en la liga naziunala A saja forsa memia bler? En il futur ston ins segir far questa dumonda. La quantitad da giugaders na saja en il Grischun betg uschè auta sco en ils chantuns Berna u Turitg che han mintgamai trais equipas en la pli auta liga svizra.
Curaschi fan a Gion Caviezel dentant ils juniors. Las squadras da sut 15 onns, per exempel, tutgan tar las meglras quatter equipas en Svizra. El haja la speranza che quests giuvens vegnan, baud u tard, da far il pass tar Cuira Unihockey u tar ils Alligator Malans. Quai pudessi dar nov schlantsch a las equipas.
Sch'i va vinavant sco fin qua èsi probabel grev da tegnair en il futur duas squadras en la liga naziunala A.
En general saja per il president da la federaziun grischuna d'unihockey impurtant da tegnair la giuventetgna vi dal sport. El percorscha che blers giuvens chalan cun il sport tranter 16-20 onns, per exempel cura ch'els giajan en la bassa a lavurar u studegiar. I saja da gronda impurtanza da guardar ch'ils giuvens tegnan il plaschair vi da l'unihockey.
Tar las dunnas na sto l'unica equipa grischuna en la liga naziunala A, Piranha Curia, betg far quitads da relegaziun. Malgrà bleras midadas en l'equipa ils ultims onns, è Piranha actualmain sin plazza quatter da la tabella ed uschia gia fix en ils playoffs.
Piranha Cuira è in'instituziun en l'unihockey da dunnas ed è vegnì dal 2010-2018 en tut set giadas campiun svizzer.
