Siglir tar il cuntegn

Header

audio
Tokio 2020: In zic schintoissem, in zic budissem – religiun en il Giapun
Or da Actualitad dals 29.07.2021.
laschar ir. Durada: 07:09 minutas.
cuntegn

Tokio 2020 «Nascher sco schinto e murir sco budist»

Duas religiuns domineschan la vita religiusa da las Giapunaisas e dals Giapunais: il schintoissem ed il budissem. Las duas religiuns coexistan a moda paschaivla. Tut tenor basegn vegn rugà en in sanctuari u en in tempel.

Il schintoissem è la religiun originara dal Giapun. I sa tracta dad ina religiun da natira, vul dir ch’i vegnan aduradas ina entira rotscha da dieuas e dieus. Quai pon esser carstgauns, animals u spierts, dentant era objects sco plantas e culms.

Il budissem è vegnì il sisavel tschientaner en il Giapun, quai cun paders coreans. Il budissem na conuscha nagins Dieus, finamira è da vegnir illuminà. El ha gì ina gronda influenza sin la cultura giapunaisa. La ceremonia da té u era la moda e maniera da cultivar il curtin cun crappa e musters en il sablun èn influenzadas dal budissem.

Dapli commembers che populaziun

Ina retschertga da l’Agentura giapunaisa per fatgs culturals ha perscrutà avant intgins onns, quantas persunas ch’èn registradas tar in sanctuari schintoistic e quantas tar in tempel budistic. Il resultat ha fatg surstar. Quintà ensemen resultava la cifra da circa 200 milliuns persunas. Il Giapun dumbra dentant mo circa 127 milliuns abitants. La raschun per quest resultat surprendent è che Giapunaisas ed Giapunais cumbineschan ils ritus dad omaduas religiuns en lur mintgadi. I dat in proverbi che di ch’in Giapunais nascha sco schintoist e mora sco budist.

Per il mund il schintoissem ...

En il mintgadi, cura ch'i va per exempel per festas, nozzas u per rugar per success e cletg, van blers en in sanctuari schintoistic. La datti rituals, ins sa lava ils mauns, i dat ina pitschna unfrenda, u ch'ins scalina in zain u ch'ins sblatscha duas giadas per far attents ils buns dieus. Silsuenter mettan ins ensemen ils mauns, patratga fitg vi da quai ch'ins vul e s’enclina a la fin avant ch’ins banduna puspè il sanctuari. Quai ch'ins chatta era savens tar ils sanctuaris èn pitschnas stizuns che vendan per exempel amulets da saida per tut las situaziuns: Protecziun sin via, cletg en examens u era per chattar la gronda amur.

... per l’auter mund il budissem

Cura ch’i va per la mort u per ils antenats e perdavantas, lura sa drizzan las Giapunaisas ed ils Giapunais envers il budissem. Blers tempels budistics possedan era in santeri. A chasa han bleras famiglias in pitschen tempel en ina stgaffa nua ch’els sa regordan da lur defuncts.

RTR actualitad 11:45

Artitgels legids il pli savens

Scrollar a sanestra Scrollar a dretga