Sin fundament da las prognosas da l'aura savevan ils organisaturs da la 15avla Trofea Péz Ault che las cundiziuns durant las concurrenzas davantian pretensiusas cun naiv nova e vent. Tuttina ha la concurrenza verticala cun partenza sper il Catrina Resort ed arrivada a Caischavedra pudì vegnir organisada tenor plan la sonda. Sin fundament da la naiv nova ha la lingia da la cursa individuala da la dumengia dentant stuì vegnir adattada a curta vista.
Malgrà l'aura brutta e las cundiziuns giuditgadas da cuntinuadamain han las concurrenzas pudì vegnir arranschadas. Il president dal comité d'organisaziun, Giochen Bearth, è cuntent: «Las cundiziuns da l'aura èn stadas fitg pretensiusas, era per l'organisaziun. Per quest motiv essan nus satisfatgs ch'igl è reussì d'arranschar las cursas cun uschè bleras e uschè blers participants.
Quai è stà pussaivel grazia al grond engaschament dal comité d'organisaziun sco era da bleras e blers gidaders. Da nossa vart va er in grond cumpliment a las atletas ed als atlets ch'èn stads prompts da concurrenzar malgrà quell'aura pretensiusa e da procurar per cursas d'aut nivel.»
-
Bild 1 von 3. Las trais indigenas Anja Berther-Klittich (davos), Silvia Brandstetter (sanester) ed Emerita Flepp (dretg) n'han betg lascha starmentar da l'aura. Bildquelle: FMR / Giochen Bearh.
-
Bild 2 von 3. Las cundiziuns da concurrenza da la Trofea Péz Ault a Mustér la fin da l'emna passada èn stadas fitg pretensiusas. Bildquelle: FMR / Giusep Venzin.
-
Bild 3 von 3. La naiv nova ha pretendì in grond engaschament da las concurrentas e dals concurrents. Bildquelle: FMR / Giusep Venzin.
Sco quai ch'il comité d'organisaziun scriva en ina communicaziun als meds da massa, è la Trofea Péz Ault stada ina da las ultimas concurrenzas da turas da quest enviern. Bleras atletas e blers atlets han nizzegià la chaschun da mussar lur buna furma per la fin da la stagiun.
Victur dal di da la dumengia è Marco Wildhaber da Tusaun daventà. Cun 200 concurrentas e concurrents cuntanschan ils organisaturs da la Trofea Péz Ault in nov record da participaziun.