Unihockey umens - Relegaziun pli datiers che mai

Che l'equipa da Cuira sto cumbatter encunter la relegaziun n'è nagut nov. Gia ils ultims onns (anc sut il num Cuira Unihockey) èsi savens stà in cumbat per restar en la liga naziunala A. Actualmain sa chatta l’equipa d’umens en la seria da relegaziun cunter Basilea. Suenter l’emprim gieu è Cuira cun 0:1 enavos – trais victorias èn necessarias per gudagnar la seria.

Malgrà la situaziun seriusa resta il president Stefan Caprez pragmatic: «Nus essan optimistics da pudair dumagnar la sfida». Tuttina è il respect era grond. Ina tema da la relegaziun na dettia dentant betg.

Cuira betg pli il mecca da l’unihockey

Ils temps, nua che Cuira valeva sco ina bastiun da l’unihockey svizzer, èn dentant gia ditg passads. Sco Stefan Caprez explitgescha, han equipas da la Bassa surpiglià il domini. Las raschuns èn diversas: auters clubs han in pli grond territori da recaltgar giugaders e dapli pussaivladads finanzialas. Ultra da quai sa mida era la fidaivladad dals giugaders – blers talents bandunan la regiun per studegiar e restan lura en autras regiuns.

Il goli Christoph Reich è cun ses 32 onns in dals rutiniers da Floorball Cuira United. El ha gia dà per la naziunala svizra ed ha quasi si'entira carriera giugà per Cuira unihoc. El ha pia vis bler, ha absolvì blers cumbats. Tenor el manchia in zic la fom en l'equipa da vegnir megliers. Plinavant saja era la qualitad pli bassa ch'ils ultims onns, spezialmain tar ils giugaders esters. Uschia è la relegaziun uschè datiers sco anc mai.

Consequenzas finanzialas e perspectivas

Ina relegaziun avess era consequenzas finanzialas. Il budget dal club munta actualmain a radund 1,5 milliuns francs, la gronda part dals daners van en l’equipa d’umens. Tenor Caprez na sa midassan las expensas betg drasticamain en la liga naziunala B – dentant las entradas pudessan sa reducir.

Da vart dals sponsurs datti dentant signals positivs: la gronda part ha gia annunzià ch’ella restia fidaivla al club, independent dal resultat sportiv.

Guardond en l’avegnir na vul il president betg excluder mesiras pli profundas. Ina opziun pudess esser da concentrar las forzas en la regiun – per exempel en furma d’ina fusiun cun Alligator Malans. Era sch’ils da Malans han mantegnì la classa questa stagiun, n’èn er els dapi in temp betg pli in top club en Svizra.

Per il mument è dentant il focus cler sin la seria da relegaziun. Floorball Cuira United sto reagir per pudair volver la seria encunter Basilea. Autramain hai num per il club da far il pass en la liga naziunala B. Ed era sche la seria encunter Basilea vegn anc gudagnada, n'èsi betg a fin cun il cumbat per restar en la liga naziunala A. En gliez cas sto Cuira anc dar ina seria encunter il segund da la liga naziunala B.