Siglir tar il cuntegn

Header

cuntegn

Val di Fiemme Amundsen gudogna il Tour de ski

  • Il Franzos Jules Lapierre è stà il pli spert sin l'Alpe Cermis e gudogna uschia la davosa etappa dal Tour de ski.
  • La victoria dal Tour de Ski va al Norvegiais Harald Amundsen, en la davosa etappa curra el sin rang tschintg.
  • Beda Klee terminescha ils 10 kilometers sin l'Alpe Cermis sin rang otg, e daventa a la fin en il classament general ferm tschintgavel.
  • Sophia Laukli dals Stadis Unids ha gudagnà l'etappa finala tar las dunnas.
  • L'Americana Jessie Diggins gudogna il Tour de ski da las dunnas.

Ultima etappa a Val di Fiemme

Exact 33 minutas ha Jules Lapierre (FRA) duvrà per dumagnar ils 10 kilometers sin l'Alpe Cermis. En il sprint final ha el distanzià il concurrent Friedrich Moch (GER) per 2,4 secundas ed uschia gudagnà l'ultima etappa dal Tour de ski da quest onn. Davos quest duo è cun Hugo Lapalus currì in ulteriur Franzos sin il podest, el è stà 16 secundas davos il victur.

La victoria da l'entir Tour de ski ha segirà il Norvegiais Harald Östberg Amundsen. El ha defendì ses avantatg avant la davosa cursa a moda suverana, ed ha la finala gì 1 minuta e 19 secundas reserva sin Moch, Lapalus è stà anc 13 secundas dapli enavos.

Ferm resultat svizzer

Beda Klee, ch'aveva anc dastgà far speranzas levas sin il podest dal Tour de ski, è currì en l'etappa finala sco 8avel sur la lingia en l'arrivada. Il Svizzer ha uschia fatg en il classament general il sigl sin il 5avel rang, sin il podest ha mancà in pau dapli ch'ina mesa minuta. Il plaz tschintg da Klee è ordvart remartgabel. Dasper Dario Cologna ha en il Tour de Ski be anc Curdin Perl dumagnà cun il quart rang il 2011 in classament da top ten per la Svizra.

video
Beda Klee cun resultat remartgabel
Or da Sport-Clip dals 07.01.2024.
laschar ir. Durada: 1 minuta 24 Secundas.

Cyril Fähndrich, ch'era currì il di avant sensaziunalmain sin il podest, n'ha betg pli pudì tegnair pitg dal tut tar l'ascensiun ed è la finala vegnì 22avel. En il classament general fa il Svizzer uschia la fin finala il 13avel rang.

Victoria americana tar las dunnas

Tar las dunnas hai dà duas victorias americanas il davos di dal Tour de ski. Sophia Laukli ha gudagnà l'etappa finala avant la Norvegiaisa Heidi Weng e la Franzosa Delphine Claudel. En il classament general ha victorisà l'Americana Jessie Diggins, avant Heidi Weng e la Finnlandaisa Kerttu Niskanen. Las Grischunas Nadja Kälin e Désirée Steiner èn vegnidas en l'ultima etappa 24avla e 25avla. En il classament general è Steiner 21avla e Kälin 24avla.

RTR novitads 16:00

Artitgels legids il pli savens