La passlunghista engiadinaisa da 24 onns ha persvadì en la cursa da persecuziun sur 20 kilometers en il stil classic en il rom dal Tour de Ski a Tavau e realisà ses meglier resultat da la carriera. Giuliana Werro, partida cun il numer 43 cun in retard da 1:20 minutas è vegnida enavant fin sin il 29avel plaz ed uschia classada per l’emprima giada insumma sut la top 30 en ina cursa da la cuppa mundiala.
Ina cursa tactica
Tar cundiziuns grevas cun blera naiv ha Werro gia baud pudì suenter a la gruppa da testa, era perquai ch’igl è vegnì tactà fitg durant ina lunga fasa da la cursa. Pir sin ils davos kilometers hai dà ina differenza. Giuliana Werro ha la finala cuntanschì l’arrivada cun in retard da bun 50 secundas sin la victura Kerttu Niskanen. La spezialista finlandaisa en il stil classic ha battì en il sprint final l’Americana Rosie Brennan per 0,8 secundas. Cumplettà il podest sco terza ha Jessie Diggins, in’ulteriura Americana. Diggins, che sa chatta a la testa dal classament general dal Tour de Ski, ha però pers gia 8,7 secundas.
Nadine Fähndrich sut las top 15
Meglra Svizra è vegnida Nadine Fähndrich. La Lucernaisa è stada ditg en la gruppa da testa ed ha pir a la fin pers il contact cun las meglras. Alla fin ha Fähndrich cuntanschì l’arrivada sco 15avla cun in retard da 24,3 secundas. Suenter la cursa ha Nadine Fähndrich annunzià ch’ella vegnia a bandunar il Tour ed uschia betg pli far il viadi en la Val di Fiemme per las davosas duas etappas.
Andreas Wieland direct da Tavau
Kälin e Steiner persvadan a chasa
Cun Nadja Kälin da San Murezzan e Désirée Steiner da Tavau han era las ulteriuras Grischunas mussà ina stupenta cursa da persecuziun davant ils fans da chasa a Tavau. Kälin è vegnida 21avla cun in retard da 31,6 secundas e Steiner ha sco 32avla manchentà be per pauc in plaz sut las top 30 ed uschia puncts da la cuppa mundiala. La matadura locala ha pers 49,7 secundas sin la Finlandaisa Kerttu Niskanen. Plinavant è Anja Weber vegnida 27avla cun in retard da 49 secundas.
Beda Klee manchenta piz a cup il podest
En la cursa da persecuziun dals umens sur medemamain 20 kilometers ha Beda Klee procurà per il meglier resultat svizzer. Il passlunghist dal Toggenburg è vegnì 6avel ed uschia realisà ses meglier resultat da la carriera. Sin il terz plaz han la finala sulet duas secundas mancà.
Festivà ina victoria traidubla han ils Norvegiais. Il leader dal Tour de Ski, Harald Östberg Amundsen ha battì en il sprint final Henrik Doennestad. Cun in retard da gia passa ina mesa minuta ha Martin Loewstroem Nyenget cuntanschì l'arrivada sco terz. Segund meglier svizzer è stà Cyril Fähndrich, il frar da Nadine Fähndrich. El è vegnì 20avel cun in retard da 1:42 minutas. Plinavant è Antonin Savary vegnì 43avel.
Uschia vai vinavant
La fin d’emna va il Tour de Ski a fin en la Val di Fiemme. La sonda spetga anc ina giada ina cursa da distanza sur 15 kilometers en il stil classic, la dumengia va il Tour a fin cun l’etappa spectaculara sur 10 kilometers en il stil liber siadora sin la legendara Alpe Cermis.
