Suenter che la naziunala svizra da las dunnas ha stuì far il pass da la liga A giu en la Nations League, è il focus uss sin il campiunadi europeic a chasa. Per l'emprim pre-camp a Magglingen ha la trenadra Pia Sundhage nominà 35 giugaduras. 30 entran en servetsch glindesdi proxim a Magglingen, uschia communitgescha l'Associaziun svizra da ballape. Intginas vegnan pir la segunda u la terz'emna da preparaziun.
Part dal cader provisoric èn tut las giugaduras ch'èn era stadas en la glista da la Nations League. Ed er Livia Peng da Domat fa part da quest cader.
«Las proximas emnas èn in'ulteriura pussaivladad per sa preparar per il campiunadi europeic. Il focus vegn ad esser da dar a tuttas anc ina giada ina schanza e da far il proxim pass», sa lascha citar Sundhage en la communicaziun da medias.
Suenter l'emprima emna da preparaziun a Magglingen vegnia a dar in tagl. Il cader definitiv cun 23 giugaduras vegna Sundhage a dar enconuschent ils 23 da zercladur. L'emprima prerunda dat la Svizra ils 2 da fanadur a Basilea cunter la Norvegia.
L'urari fin a l'EURO
| 9. da zercladur | Start 1. emna da preparaziun a Magglingen |
| 16 da zercladur | Start 2. emna da preparaziun a Nottwil |
| 23 da zercladur | Annunzia dal cader |
| 23 da zercladur | Start 3. emna da preparaziun ad Abtwil |
| 26 da zercladur | Gieu da test cunter Tschechia a Winterthur |
| 2 da fanadur | Women's EURO 2025: Svizra – Norvegia a Basilea |
| 6 da fanadur | Women's EURO 2025: Svizra – Islanda a Berna |
| 10 da fanadur | Women's EURO 2025: Finlanda – Svizra a Genevra |
Or da l'archiv: