Tut tenor tge camera u telefonin ch'ins prenda per fotografar datti er differents formats da datoteca. In iPhone a partir da la sisavla generaziun arcunescha ina fotografia en il format HEIC, in telefonin d'Android arcunescha sco JPG u PNG – dentant èn insumma er auters formats pussaivels.
Auters formats da datoteca pon esser TIF, DNG, WebP, GIF, BMP ed uschia vinavant.
Ma ils formats forsa ils pli enconuschents e populars èn JPG e PNG – perquai sco exempel ina cumparegliaziun da quels:
| JPG | PNG |
| + Document n'è betg uschè grond | + Mantegna la qualitad |
| + Pli simpel da parter | + Pussaivladad d'arcunar transparenza |
| - Cumprimaziun po effectuar perdita da qualitad | - Il document è pli grond |
| - Betg optimal per il squitsch | - Spectrum da colurs è limità |
Cameras digitalas da fotografar pon sper formats sco JPG er arcunar datas primaras en in format RAW. Quasi mintga producider da cameras ha ses agen standard, dentant funcziuni per regla medem: Cun il format da datoteca RAW arcunescha la camera bler dapli infurmaziuns ch'ina fotografia JPG u PNG e pussibilitescha uschia er manipulaziuns extendidas en in program specific per quai. Talas manipulaziuns pon esser correcturas da l'exposiziun d'ina fotografia, dentant er correcturas da colur, saturaziun e cuntrast euv.
