Per Marc Lechmann èsi in ferm cuntrast tar sia lavur sco fin qua. Avant è el stà sur onns directur dal «Renaissance Lucerne Hotel» e «The Hotel Luerne Autograph Collection». Sia lavur en l'ustaria da muntogna è pli vasta, ils inscunters cun ses giasts èn pli persunals, en ustaria da muntogna è mintga di auter.
-
Bild 1 von 4. Marc Lechmann. Bildquelle: Marc Lechmann.
-
Bild 2 von 4. Bildquelle: Marc Lechmann.
-
Bild 3 von 4. L'interiur da l'ustaria. Bildquelle: Marc Lechmann.
-
Bild 4 von 4. Bildquelle: Marc Lechmann.
En «Nossa cuschina» raquinta Marc Lechmann co ch'ina casualitad è stada il punct da partenza da midar da l'hotel a l'ustaria da muntogna. Sin tge ch'el e ses pitschen team metta gronda paisa e co ch'igl è vegnì tar quai ch'in curry ha dumagnà sin la carta da menu dal Dorschnei.
Da l'hotel a l'ustaria da muntogna
La midada da l'hotel a l'ustaria da muntogna è stà in grond pass perquai ch'igl è in zic in auter ambient, quai di Marc Lechmann. Il gastronom ha nizzegià la chaschun da far quest pass dad ir sur sasez, schegea ch'el n'ha mai tschertgà activamain la pussaivladad da manar in di in'ustaria da muntogna. In pèr onns experientscha en la gastronomia han dentant gidà el da far quest pass.
Il gastronom oriund da Trun è sa sentì madir per surpigliar la nova incumbensa da manar il restaurant da muntogna.
En l'hotel hai jau gì onns en ed onns ora tschop e cravatta, sin il restaurant da muntogna è quai in zic auter
La pli gronda differenza tranter in hotel ed in'ustaria da muntogna è surtut la lavur sco tala, en l'hotel datti ina lavur reglada. Mintgin sa tge ch'el sto far, en l'ustaria da muntogna è la lavur bler pli vasta, quai fa grond plaschair a Marc Lechmann.
Mintga di è auter
Il di da lavur cumenza per Marc Lechmann la damaun cun far viadi ensemen cun ses team vers l'ustaria da muntogna. Mintga di saja in pau auter là al pe dal Pilatus, di Marc Lechmann. En sia lavur dettia dapli surpraisas che muments tipics. En il manaschi da gastronomia da muntogna sajan ins per l'ina dependent da l'aura, per l'autra saja grev da prevesair tge che vegn a vegnir. Per el e ses team saja en talas situaziuns da surpraisa impurtant d'esser flexibel.
En in pitschen restaurant da muntogna è la lavur pli vasta ch'en in grond hotel
Ils inscunters cun ses giasts sajan pli persunals en in'ustaria da muntogna ch'en in hotel en la citad. Ins s'avischina in a l'auter a moda differenta, pli cordial e main anonim.
Tranter sia clientella regulara quinta Marc Lechmann durant l'emna ils seniors da la regiun che vegnan en ustaria, la fin d'emna frequentan lura pli savens famiglias e giuventetgna sco er turists dal di. Cunquai che l'ustaria da muntogna sa chatta sper ina via da velo pon Marc Lechmann e ses team er beneventar bikers tar el en l'ustaria.
La carta da menu
La carta da menu da l'ustaria da muntogna Dorschnei sur Kriens è locala e stagiunala. Per Marc Lechmann èsi impurtant da pudair retrair products da la regiun, uschia chatt'ins tratgas tradiziunalas da la regiun sin la carta.
Tranter las spezialitads sa chattan spaisas cun charn d'angus. Ina spaisa da la carta da menu dat dentant en egl, il bergcurry, proponì da la cuschiniera che deriva da l'Africa dal Sid.
Igl è impurtant ch'ins serva a la glieud quai che la glieud ha gugent e betg quai ch'ins ha sez gugent
Sper la carta da menu tradiziunala datti er cartas da menu per differentas occasiuns. Saja quai per dis da festa u er ina carta da gril per dis da bell'aura. Per Marc Lechmann èsi impurtant da porscher ina carta cun products frestgs e stagiunals. Uschia saja era pussaivel da mantegnair la qualitad dals products e da dar variaziun sin il plat.
Il «Bergcurry»
In plat preferì da la cuschiniera da l'ustaria Dorschnei al pe dal Pilatus è il bergcurry.
Ina cuschina frestga e locala è stada per mai davent da l'entschatta ina premissa impurtanta
La cuschiniera che deriva da l'Africa dal Sid cumbinescha charn-bov da la regiun cun verdura da curry ed autras spezarias. Il bergcurry vegn per ordinari servì cun ris.