«Il pli simpel èsi d'integrar las substanzas amaras en cuschina», di Simona Hendry. Avant passa 20 onns ha Simona Hendry da Glion fatg il studi da naturopata, suenter avair lavurà blers onns sco droghista diplomada.
Tar sia lavur sco naturopata èn ervas curativas e medicinalas la basa ed in bun cumplement tar la medischina tradiziunala per sustegnair la sanadad da l'uman. Las substanzas amaras sajan fitg savens in tema tar sintoms da staucladad, mal il tgau, ma surtut era tar problems da la digestiun.
Substanzas amaras promovan il metabolissem ed activeschan la funcziun dal girom.
Cicoria blaua, flur chadaina, la flur artischocca, erva flurin, l'iva millifeglia, assens e bleras autras ervas medicinalas èn bunas furnituras da substanzas amaras. Ma era salatas, sco l'endivia, il cicorino e la rucola, las artischoccas ed il ravanel èn buns represchentants per ils amars en cuschina.
Idea per la cuschina
Simona Hendry cusseglia d'integrar regularmain las substanzas amaras en il mintgadi. Gist per uffants saja ina leva dosa regulara d'avantatg: «Products cun gust amar ha l'industria per part manipulà per reducir ils amars, ma per la sanadad èsi impurtant d'integrar en la cuschina ervas e verduras cun substanzas amaras», di Simona Hendry.
Dunnas en speranza e persunas che pateschan da l'allergia da fain, na duessan betg duvrar substanzas amaras.
Simona Hendry scusseglia dentant a dunnas en speranza da far diever da substanzas amaras: «Pli baud duvravan ins assens per aborts. Substanzas amaras n'èn nagina opziun durant la gravidanza».
Ambassaduras da substanzas amaras
-
Bild 1 von 6. La iva millifiglia (Achillea millefolium). Questa erva cuntegn bleras substanzas amaras. Buna per ina maschaida da tè u er en furma da tinctura gida ella da sustegnair il metabolissem. Bildquelle: Bruno Vonarburg.
-
Bild 2 von 6. La flur chadaina (Taraxacum officinale). Las ragischs da la flur chadaina cuntegnan bleras substanzas amaras. Per tincturas da substanzas amaras na dastga ella betg mancar. Bildquelle: Bruno Vonarburg.
-
Bild 3 von 6. Flur Artischocca (Cynara cardunculus subsp. scolymus. L'artischocca è savens preschenta tar aperitivs. Las substanzas amaras mettan en moviment il metabolissem avant ina spaisa opulenta. Bildquelle: Bruno Vonarburg.
-
Bild 4 von 6. La cicoria blaua (Cichorium intybus). La cicoria blaua cuntegn substanzas amaras che gidan a restar svegl ed attent – tut tenor il motto : amar fa dasdar! Bildquelle: Bruno Vonarburg.
-
Bild 5 von 6. Erva flurin (Centaurium umbellatum). Buna per maschaidas da té u era per producir tincturas cun substanzas amaras. Bildquelle: Bruno Vonarburg.
-
Bild 6 von 6. Assens – blers amars e privlusa per dunnas en gravidanza . Assens (centrocercus urophasianus) èn buns per equilibrar acids e reducir convulsiuns dal magun. Ma els n'èn nagina opziun per dunnas en gravidanza. Bildquelle: Bruno Vonarburg.
Durant il mais dal matg ans accumpogna la naturopata e droghista da Glion cun tips e trics, nua ch'ins po chattar las substanzas amaras e co applitgar quellas en il mintgadi ed en nossa cuschina.