El ha purtà vent frestg en il Vatican, viva en modestadad consequenta, s'engascha per ils paupers ed ha inizià insaquantas refurmas en la baselgia catolica. «Memia paucas refurmas ha el manà a fin», din dentant ils critichers e las criticras. Il papa vegn era crititgà en auters reguards, per exempel per avair inculpà la NATO d'avair provocà la Russia. Ussa è papa Francestg 10 onns a la testa dals catolics e da las catolicas ed ha a quella chaschun dacurt dà in'intervista a l'emettur RSI.
La guerra en l'Ucraina saja daventada ina fiera da l'industria d'armament internaziunala. Ins fetschia guerra, vendia las armas veglias ed emprovia las novas. I dettia interess imperials da tut las varts – da la Russia, però era dad auters pajais. Tge pajais ch'el ha manegià cun quai, n'ha Francestg betg ditg.
Er da sia sanadad, sias experientschas sco parsura da la baselgia catolica e da la rolla da la Svizra en la guerra ha il pontifex discurrì. Plinavant ha el prendì posiziun en connex cun l'abus sexual en la baselgia catolica ed ha tradì tge ch'el di ad unfrendas d'abus sexual. Ina resumaziun da l'intervista dal papa datti quest'emna en Vita e cretta.
