A l’entrada dal Center da chors sa chattan ina massa tschappas e chalzers d’uffants giun plaun. Els n’èn betg ordinads sco en scola, qua èsi tut in zichel auter. Igl è bain in lieu da furmaziun, ma er in pau sco in dachasa: «Il Center da chors è per mai sco in segund dachasa. Suenter scola ans inscuntrain nus cun las amias da chant qua e chantain ensemen,», di ina matta da 14 onns. Ella chanta gia blers onns en la «Stimmwerkbande», il chor d’uffants da Cuira e conturn che Christian Klucker aveva fundà avant passa 20 onns.
Il Center da chors – el viva!
Tar la visita da RTR en il Center da chors è il plaschair da chantar fitg palpabel. Quai resplenda ils giavischs fundamentals ch'ils iniziants avevan tschentà sco finamira. Tschintg onns èn passads dapi che Christian Klucker, Gian-Reto Trepp, Heinz Girschweiler ed Anna Laura Klucker han avert las portas da l'emprim Center da chors dal Grischun.
La chasa dil chant
-
Bild 1 von 8. Christian Klucker: in iniziant dal Center da chors a Cuira. Christian Klucker è promotur da la cultura da chant ed è stà in dals iniziants da Center da chors a Cuira. Bildquelle: RTR.
-
Bild 2 von 8. Braida Janett è ina da las trais magistras da chant tar il chor d'uffants «Stimmwerkbande». Ella è musicista e redactura da musica tar RTR. Bildquelle: RTR.
-
Bild 3 von 8. Braida Janett è multi-instrumentalista, chantadura e dapi l'onn 2024 ina da las dirigentas en il Center da chors. Bildquelle: RTR.
-
Bild 4 von 8. Causa vacanzas è la gruppa da chant oz pli pitschna. Tar las emprovas da chant cun paucs uffants po Braida Janett dar spazi a solistas e solists. Bildquelle: RTR.
-
Bild 5 von 8. Tge gira? La tavla naira dat infurmaziun . 12 chors fan actualmain emprovas da chant en il Center da chors. Sin la tavla naira è da vesair tut quai che gira tar ils chors. Bildquelle: RTR.
-
Bild 6 von 8. Giuvnas altistas dal chor «Incantanti». Christian Klucker ha fundà il «l'Ensemble vocal Incantanti» l'onn 2002. Bildquelle: RTR.
-
Bild 7 von 8. Mona Bissig en discurs cun Gaby Degonda. Mona Bissig: «Il Center da chors è il lieu nua tut il chor Incantanti s'inscuntra. Qua vegn chantà auter che en ina aula da scola. Bildquelle: RTR.
-
Bild 8 von 8. La biblioteca da notas dal Center da chors a Cuira. Passa 30'000 chanzuns da tut gener e stils da musica sa chattan en la biblioteca dal Center da chors. Bildquelle: RTR.
Là, nua ch'i vegniva fabritgà parts per apparats per il tegnairchasa, vegn ussa chantà e vivì cultura. 12 chors han chattà en il Center da chors a Cuira in lieu per far emprovas da chant ed in lieu d'inscunter per esser creativ cun chant e musica.
Ils davos onns haja dà plirs projects communabels e collavuraziuns tranter ils chors che chantan en il Center da chors, ma era dumondas per sustegn tar dirigentas e dirigents. Era chors ordvart il center hajan duvrà la purschida dal center.
In'istorgia plain passiun
Per tge batta il cor da Christian Klucker il pli ferm, per esser dirigent u per esser manader dal Center da chors? En sasez saja el in dirigent passiunà, ma era lavurs administrativas fetschia el gugent.
Actualmain è Christian Klucker entratschà en il project «Singstadt Chur» en collavuraziun cun Cuira Turissem. Cun la finamira da promover chant e litteratura da chant grischuna cun sia trilinguitad. Ma era cun la finamira da l'organisaziun d’eveniments e da chors durabels, per etablir in turissem da chors persistent.