Curs cumenzan savens cun la dumonda tge che las participantas spetgan propi da la scolaziun. Nagut auter questa giada. Ina chaussa che pareva fermamain en il focus è stada da pudair profitar da la savida e l'experientscha vicendaivla, dentant era dramaturgia e tecnica stevan en il center. Sa scolar cun far uschè blera pratica sco pussaivel, quai è la devisa da la manadra Esther Berther. Vitiers tutga bler barat e discussiuns davart experientschas fatgas e betg emblidar – salvar l'umor e la calma.
La reportascha è la pli bella furma da radio – ella sveglia maletgs en il tgau e porta ins en il lieu d'acziun.
L'emna ensemen è stada ina emna extraordinaria perquai che tuttas pon sa concentrar sulettamain sin ina chaussa – e quai è da realisar ed emprender usche bler sco pussibel. La atmosfera lucca e fitg motivada da tuttas redacturas ha procurà che exact quai e stà pussibel.
Raquintar d'in lieu ubain da persunas munta esser attentas sin tut quai che capita. Era quai sto esser exercità. Las redacturas han pudì tscherner in tema ed ensemen cun la manadra ir al lieu. Davent dad odurs da tschigulatta enfin café, davent da la vita en il stan da sajettar a Domat enfin in center da chors, la variaziun è stada gronda. Cler che mintgina è vegnida cun sia atgna vista sin la reportascha e sin las ambiziuns. Yvonne Simmen che lavura gia blers onns tar RTR, ha era giavischà da pudair far quest curs.
Far reportaschas è la disciplina roiala da radio ed jau charez questa disciplina.
Betg uschè blers onns en chasa RTR lavuran las redacturas Nora Pfister ed Anja Furger. Era ellas èn sa participadas ed han gì ina pluna mirveglias e dumondas. Nora ha vulì savair exact co café vegn producì e quai davent da la fava da café enfin in bun café en la scadiola.
Las participantas dal curs en acziun
-
Bild 1 von 4. Gaby Degonda va en schanuglias per ils megliers tuns. Durant ina emprova en il center da chors a Cuira. Bildquelle: RTR.
-
Bild 2 von 4. Anja Furger charezza tschigulatta. Natiralmain ha ella era tschernì quest tema per sia reportascha. Bildquelle: RTR.
-
Bild 3 von 4. Nora Pfister è surstada da tge che café po savurar. Degustaziun da café cun blers tuns... Bildquelle: RTR.
-
Bild 4 von 4. Braida Janett realisescha ina Marella dal sport da sajettar. In tema quasi nov per ella. Bildquelle: RTR.
En in mund per ella totalmain ester è Braida Janett ida per realisar sia emprima Marella, e quai anc sco reportascha. Ina sfida persunala ch'ella è sa laschada en cun blera mirveglia. «Ston ins propi ir uschè datiers cun quest microfon?» ha ella dumandà durant la registraziun en il stan da sajettar. «Geabain – bler auter na va quai betg sche ti vuls turnar a chasa cun bels tuns» ha ditg la manadra dal curs in zic riend. Quai è ina chaussa da disa, cun il temp daventa quai che para l'entschatta in zic penetrant lura rutina e chaussa da mintgadi.
Il pli gugent cumenzass jau grad puspè cun ina nova reportascha suenter questa emna plaina cun tips e trics.
Gaby Degonda – sezza ina amatura da chant e musica – è sa decidida da far ina visita en il center da chors a Cuira. La è ella fitg spert sa maschadada tranter chantaduras e chantadurs per rimnar tuns e suns. Cun grond anim e plaschair per las chanzuns, dentant era per udir il pertge che la chasa da chors plascha. Dal curs po ella dir tant:
Il curs ha avert a mai novas portas per raquintar istorgias.
Las istorgias realisadas en furma da reportascha èn ussa prontas per vossas ureglias. Qua avais la schelta e – sa chapescha che tuttas sa legran era d'udir in resun u l'auter sin la lavur realisada durant questa emna. Per resuns per plaschair duvrar il formular agiuntà, cun menziunar la persuna che vus vulais pledentar.