Da la fava fin la tavla - Tschigulatta: dad A fin Z

Da la damaun fin la saira lavura Barbara Mendes cun tschigulatta. Ella ha dacurt finì ses emprendissadi sco confisiera e la dumonda sch'ella mangia anc tschigulatta n'auda ella betg per l’emprima giada. Cun in surrir raquinta ella:

Barbara Mendes porta chautschas nairas cun finas strivlas alvas, ina unifurma stgir blaua ed ina baretta naira da taila. Sia plazza da lavur è amez il café – quai è vulì uschia per ch'ils giasts vesan che la tschigulatta vegn fatga dad A fin Z en chasa. En l'entira ustaria pari enturn ed enturn mo d'avair tschigulatta: tavlas, tschigulattins, pralinas. En l'aria hai in'odur dultscha da cacau barsà. Qua paran ins d'esser en il pajais da la cucagna.

Sch'ins guarda enturn pli exact en l’ustaria, lura ves'ins ina massa maschinas, satgs da juta cun scrit si en nair «Organic Cocoa Beans» e davos stgatlas da chartun cun spezarias. Tar ina maschina cula tschigulatta ord ina spina en in zaiver.

Da la fava da cacau a la tavla da tschigulatta

Entadim il local hai in grond isch da vaider. Davos quel sa chatta, sin in fitg pign spazi ed adina en vista dals giasts, la manufactura da tschigulatta, il reginavel da Barbara Mendes. Là vegn producì 90 kilos tschigulatta al di e passa 18 tonnas ad onn.

Mintga singul gram da questas 18 tonnas cumenza sia via sco fava da cacau setgentada e tuttas ston vegnir controlladas da Barbara Mendes: sco emprim cun in cul, alura a maun. Suenter la controlla vegn la fava per 40 minutas en la maschina da barsar. La fava barsada fa ch'igl odura puspè dultsch en quai pitschen spazi.

La fava barsada sto sfradentar sur notg avant ch'il viadi po ir vinavant. Il proxim di fa ina maschina davent la crosa, rumpa la fava en tocs pitschens e fa ordlonder ina massa. Quella è anc fitg spessa e gusta plitost piter, sco tschigulatta naira. En la proxima maschina vegnan lura agiuntadas differentas ingredienzas sco zutger e pulvra da latg.

Insatge manca anc

Malgrà che la massa para gia sco tschigulatta, ella na gusta betg propi sco quai ch'ins è disà. I dovra anc l'agid dal star da las maschinas, la maschina da concar.

La maschina maschaida, maschaida e maschaida. En tut 18 uras ditg. Quai fa che la tschigulatta daventa anc pli fina e che las substanzas amaras spareschan.

Pazienza para dad esser in'impurtanta ingredienza. Ma era la qualitad da tut tschels products sto esser auta. Mo products da qualitad bio vegnan duvrads per che la tschigulatta daventia buna.

Ed a propos meglra tschigulatta: Per la confisiera datti sin questa dumonda mo ina resposta correcta: tschigulatta da latg.