En la Gronda Britannia ha la polizia tschiffà il 2023 in lader da 200'000 ovs da tschigulatta. Suenter ina chatscha da persecuziun ha la polizia pudì franar in auto suspectus ed ha chattà ils dultschims engulads en la valur da 42'000 francs.
L'acziun saja stada «eggcellenta» (gieu da pleds d'ovs ed excellent), ha la polizia fatg sgnoccas suenter avair confiscà la preda ed arrestà il lader da 32 onns.
Engulà 400'000 bastunets da Kitkat
Il concern d'alimentaziun Nestlé è in'emna avant Pasca pertutgà d'in enguladitsch pli grond. Var 12 tonnas tschigulatta u passa 400'000 bastunets da la marca Kitkat èn svanids senza fastizs. La furniziun è l'emna passada stada sin via a differents lieus da producziun e da vendita en l'Europa. Ma ussa manca dal camiun mintga fastiz, medemamain da sia dultscha martganzia.
Nestlé ha communitgà, ch'ins lavuria intensivamain vi dal scleriment ensemen cun las autoritads e cun ils partenaris da logistica cumpetents. Co exact ch'il enguladitsch ha pudì capitar, n'è fin ussa anc betg cler. Cler è dentant: i sa tracta bain d'in dals pli gronds cas enconuschents da quest gener.
Preda dultscha svizra
Era tschigulatta svizra è gia stada en mira d'in enguladitsch grond. L'onn 2014 eran vegnidas enguladas en l'Italia dapli che 260 tonnas tschigulatta da Lindt & Sprüngli. La valur totala è vegnida inditgada quella giada cun passa set milliuns euros. Pli tard han investigaders chattà 50 tonnas en in deposit sper Napoli ed ulteriuras 20 tonnas a Sezze, ina citad en il sid da Roma.
44 tonnas!
En Germania n'ha insatgi betg pudair survegnir avunda il 2017 ed engulà 44 tonnas tschigulatta. Ed era gist anc ils dus chars annexs, nua che la martganzia dultscha era chargiada. Il donn è vegnì calculà sin var 400'000 euros.
In dals chars annex han ils investigaders scuvrì curt suenter il delict tar in restaurant d'autostrada. L'automobilist era fugì a pe ed ha stuì laschar enavos la chargia cumpletta. Pli tard han ins era chattà il segund char annex. En quest cas mancavan dentant las 22 tonnas tschigulatta ch'eran tenor la polizia evidentamain vegnidas chargiadas enturn – u mangiadas subit.