Radund 19,5 milliuns lieurs da tschigulatta èn vegnidas producidas quest onn per il martgà svizzer – cleramain pli paucas che l'onn passà. Il 2025 eran quai tenor l'associaziun professiunala Chocosuisse anc 23 milliuns lieurs da tschigulatta. Tranter auter saja il consum da tschigulatta ì enavos l'onn passà pervia dals pretschs auts per il cacau.
Las lieurs da Pasca na vegnan betg luentadas
Che las lieurs da tschigulatta restantas vegnan luentadas e lura transfurmadas en figuras da tschigulatta dal Son Niclà per il temp da Nadal – quai saja be ina fama che sa tegna dentant per part ferm en ils chaus da tscherta glieud, di il pledader dal Migros.
Tar il Migros vegnian quasi tut las lieurs da tschigulattas vendidas anc avant Pasca, cunquai che las quantitads possian vegnir planisadas ordavant pulit exact, grazia a las experientschas dals ultims onns.
Tge che resta vegn vendì pli bunmartgà
«Ils pretschs dals products restants vegnan suenter ils dis da festa reducids fermamain u offrids als collavuraturs», communitgescha il Migros. Sumegliant vesia quai ora tar l'Aldi Suisse: products restants dal temp da Pasca dettia per regla plitost paucs.
Tge che resta, vegnia vendì cun rabats da fin 50%: «Ils products che na pon betg vegnir vendids malgrà in pretsch reducì, na vegnian betg luentads, mabain surdads gratuitamain – nua che pussaivel – ad organisaziuns caritativas ed uniuns per salvar la vivonda.» Er il Coop ed il Volg fetschian quai uschia: «Tut ils products restants en las butias vegnan questa e la proxima emna vendids per mez pretsch.»
Ils paucs products da Pasca ch'èn danvanz pon noss collavuraturs e nossas collavuraturas cumprar per in pretsch simbolic.
Era tar la confisaria Sprüngli na restia strusch insatge danvanz. «Ils paucs products da Pasca ch'èn danvanz pon noss collavuraturs e nossas collavuraturas cumprar per in pretsch simbolic», scriva Sprüngli. Nagins da quels products vegnian luentads u utilisads per crear auters products.