Café – dapli che mo fava - Fin ch'il fav da café è en la scadiola

Co savura café? Forsa in pau da tschigulatta u da nuschs u da caramella? Ma café po era savurar e gustar da toast, da charn, dad oranschas u schizunt magari da plantas da guglias. Tut las savurs pussaivlas ves'ins sin la roda da gusts vi da la paraid da la brassaria da café Quinta Coira.

Savurs e gusts tut spezials

Pasquale Sergi è il possessur ed ensemen cun ina da sias baristas, Celia Soltermann, fa el regularmain ina degustaziun da ses cafés – quai vegn era numnà «cupping». Per la degustaziun datti in decurs determinà: Sco emprim vegn mo il café mieut, pia la pulvra, savurada ed alura vegnan nudadas las odurs sin in protocol. Tge ch'ils dus profis savuran gia durant quest pass è incredibel: pulpa, groma u biscotg èn vegnids numnads.

Lura vegn l'aua chauda – cun ina temperatura da precis 94 grads – svidada sur la pulvra. Suenter in temp prenda Celia Soltermann davent bufatg la crusta cun in tschadun. Er da questa savur vegn puspè fatg notizias. Alura vai per empruvar: Cun in tschadun vegn il café tschitschà e lura traguttì e quai cun ina ramur da s'endisar. Uschia duain ils gusts pudair sa sviluppar meglier.

A chasa u sin visita na baivia el betg uschia ses café, di Pasquale Sergi. Insumma, ad el na fetschia darar insatgi amogna in café sch'el saja sin visita insanua. Cun in rir agiuntescha el: E sche, lura guardia el l'emprim en cuschina tge maschina che saja là. Tar ina maschina automatica saja sia resposta clera: na, grazia!

Quai «cupping» fan ils dus baristas almain mintga duas emnas. Entras quai procuran els che lur café haja adina ina buna qualitad e ch'el vegnia era brassà endretg. Sch'in café è per exempel brassà memia pauc, vegn quai adattà la proxima giada.

Da la fava al café

Era brassar il café fan els sezs en lur pitschna brassaria. Mintga glindesdi savur'ins quai er anc enturn la brassaria en la citad veglia da Cuira. La fava per il café da spezialitads da Quinta Coira deriva da differents pajais sco per exempel dal Peru, da la Columbia, da l'India, da l'Uganda u da l'Etiopia.

Cun la bartga vegnan ils satgs transportads a Hamburg, nua ch'els vegnan deponids fin che Pasquale Sergi als dovra. In camiun porta lura mintgamai la quantitad necessaria en la chapitala grischuna.

Dal café frestg al brassà

En in furn vegn la fava da café brassada uschè ditg fin ch'ella ha cuntanschì il dretg grad da brassada. Quant ditg e cun tge temperatura po variar – tut tenor la sort da la fava.

Il café perfetg na datti betg

Sper la brassaria datti in pitschen café. Là vegnan las differentas sorts da café servidas als giasts. Anna Lena Dürr da Schluein lavura là dapi dus onns parzialmain sco barista. Ses cumportament da baiver café saja sa midà fermamain dapi lura: Ella baivi ussa bler dapli café – tranter trais e tschintg al di – ed ella guardia che quel haja ina buna qualitad.

Era tar ella na dettia nagin café or d'ina maschina automatica. A chasa baivia ella il pli gugent anc adina il café or da la Bialetti – sco gia dapi l'entschatta.

Far in bun café dovria schon in pau exercizi. Ma cun sia experientscha actuala po la giuvna calmar: Propi far insatge fallà na pon ins betg. I saja impurtant d'enconuscher il dretg grad da la fava e la temperatura da l'aua gioghia ina rolla relevanta, ma gronds sbagls na possian ins era betg far sco laic.

Ma co sto el ussa esser, il café perfetg? Sin quai ha Anna Lena Dürr ina clera resposta: i na dat betg IL café perfetg, quel è per mintgina e mintgin in auter. Il café perfetg è simplamain quel ch'ins ha il pli gugent.

Co far in bun café