Il settember passà han Cilgia Koller e sia figlia Noemi dad 11 onns stuì laschar durmentar Monty, lur haflinger da 12 onns. La causa, ina cumplitgada serradira da la biglia. Schegea che laschar ir animals tutga tar la vita da mintgadi sin il bain puril sco quel dals Kollers, chaschuna la mort d'in chaval ch'ins ha tgirà sur onns, fermas emoziuns e larmas da cordoli.
Cur che Monty am veseva arrivar vers stalla, clamava el a mai. Quai ha mancà ferm e sveglia anc oz tristezza.
En «Vita e cretta» da dumengia reflectescha Cilgia Koller da la ferma relaziun ch'ella ha ed ha gì durant sia vita cun ses chavals. Ses emprim chaval Jessy ha ella survegnì cun 13 onns. Dapi lura èn chavals e bestgas en general part da sia vita. Actualmain ha ella 24 animals dal cor sin ses bain dador Ardez. Laschar ir animals tutga tiers, di ella: «Tar mia chavalla Mella ch'è morta suenter ina vita cumplenida, hai jau pers la tema da la mort, ma larmas da cordoli datti adina puspè tar la mort d'in animal».
Ina vita cun chavals
-
Bild 1 von 6. Jessy, l'emprima «amur» e l'emprim chaval. Cilgia aveva 13 onns cura che Jessy è arrivà en la vita da la matta. Bildquelle: MAD.
-
Bild 2 von 6. La chavalla Mella ha accumpignà Cilgia 29 onns da sia vita. Cilgia Koller: «Cun la mort da Mella hai jau pers la tema da la mort.». Bildquelle: MAD.
-
Bild 3 von 6. Monty il «prinzi» da Cilgia Koller: Passa 12 onns è Monty stà ils schef da la scossa da chavals sin il bain puril. (Foto dal 2019). Bildquelle: RTR.
-
Bild 4 von 6. Emprim inscunter tranter Cilgia ed Arabella. Cilgia Koller: «La puleidra ha bandunà la scossa per vegnir tar nus.». Bildquelle: Noemi.
-
Bild 5 von 6. Noemi tar l'emprim inscunter cun Arabella. Noemi ha 11 onns e charezza animals gist sco sia mamma Cilgia. Bildquelle: Cilgia Koller.
-
Bild 6 von 6. Semeglientscha tranter Monty ed Arabella (da senestra). Bildquelle: Cilgia Koller.
Duas giadas ha dunna Cilgia pudì parter il process da cumià d'in chaval cun sia figlia Noemi. Avant otg onns, cura che la chavalla Mella aveva cumplenì sia vita cun passa 29 onns, ed il settember passà tar la mort da Monty. Questa urida è anc frestga e fa mal.
Stuair laschar ir in animal vegl è auter. Ma Monty era en ses megliers onns da vita.
Noemi aveva cumenzà a chavaltgar Monty, ma era auters uffants eran gugent enturn il haflinger da colur caramel. Uschia aveva Monty ina gronda cuminanza da fans. Sia mort andetga ha chaschunà bleras larmas, ma era fitg bleras reacziuns da cordoli. Uss restan las bellas memorias, per las qualas Cilgia Koller e Noemi èn fitg engraziaivlas.
In di suenter la mort da Monty ha Cilgia Koller legì in inserat. In allevatur da haflingers a Pfunds en il Tirol tschertgava in lieu per sia puliedra dad in onn e mez. Ina dumengia avain nus visità Arabella. «Igl è stà in mument magic cura che la puliedra blonda ha laschà la scossa per vegnir encunter a nus», sa regorda Cilgia.
Ella haja resentì pel giaglina, ma era nauscha conscienza vers Monty. Sia figlia cun egliada infantila haja lura relativà: «Guarda mamma, Mella e Monty han fatg in plan, els han tramess a tai Arabella per che ti sajas puspé cuntenta».