La passiun
Yvonne Graf-Cathomen, ina chavaltgadra da dressura da Büsserach, represchenta cun sia lavur e dedicaziun il exempel ideal d'ina relaziun positiva tranter uman e chaval. Ses chaval Mr. Morningstar n'è betg mo in partenari da sport, mabain in commember da la famiglia.
La preparaziun dal di cumenza baud en la stalla nua ch'ella prepara tut per il trenament. La tgira quotidiana, il trenament ed il temp passentà ensemen mussan la profunditad da la passiun che stat davos quest sport. Yvonne sa che la armonia tranter ella e ses chaval è essenziala per il success en la dressura e lavura mintga di per rinforzar questa colliaziun.
Las varts stgiras dal sport
Sco en blers auters sports datti er en il sport da chavals ina vart stgira. Scandals han repetidamain fatg lingias grassas en las medias. Praticas discutablas, sco l'abus cun sparuns e maltractament dals animals per cuntanscher meglras prestaziuns, sveglian dumondas eticas. Il squitsch da sponsurs e l'ambiziun da tscherts chavaliers mainan a praticas che mettan en privel il bainstar dals animals.
Maletgs tragics ed incidents en la scena da chavaltgar circuleschan en las medias socialas e fan attent sin la necessitad d'ina discussiun critica davart las valurs e las praticas en quest sport.
Responsabladad ed etica
Natalie Bearth, ina veterinaria spezialisada sin chavals, accentuescha l'impurtanza d'engaschament professiunal per il bainstar dals animals. En sia pratica s'occupa ella da blessuras e da la prevenziun per garantir che ils chavals restian en buna sanadad.
Natiralmain datti quellas blessuras directamain cun il sport, sco quai ch'igl è tar nus umans. Ma or da mes mintgadi na pudess jau ussa betg dir che jau haja explicitamain dapli blessuras che vegnan chaschunadas cun far sport cun il chaval.
Ella fa cler che blessuras en il sport da chavals na pon betg adina vegnir evitadas, ma la tgira professiunala e la prevenziun pon minimar ils ristgs e garantir il bainstar dals animals. Era durmentar chavals tutga tar sia lavur. Quai n'è betg ina simpla lavur. Per Natalie è il bainstar dals chavals fitg impurtant.
-
Bild 1 von 5. La veterinaria Natalie Bearth durant sia lavur. Bildquelle: RTR.
-
Bild 2 von 5. Bildquelle: RTR.
-
Bild 3 von 5. Bildquelle: RTR.
-
Bild 4 von 5. La veterinaria deliberescha il chaval d'in abscess. Bildquelle: RTR.
-
Bild 5 von 5. Bildquelle: RTR.
Il bainstar è essenzial
Il sport da chavals po esser ina passiun profunda, ma pretenda er ina gronda responsabladad vers ils animals. L'engaschament per il bainstar dals chavals è essenzial per garantir in sport fair e persistent ed è la basa per ina relaziun respectusa tranter uman e chaval.
En vista dals scandals e da las praticas discutablas en il sport da chavals è impurtant da promover ina discussiun critica e d'encuraschar praticas che respectan il bainstar dals animals. Mo uschia pon ins garantir che quest sport restia persistent ed acceptabel per tut ils participants involvì.