La gronda dumonda dals geniturs tar la cussegliaziun da geniturs è, co els san ir enturn meglier cun las atgnas emoziuns. Per exempel sch’il sa cuntegnair da l’uffant fa vegnir vilà, trist u perplex. In ulteriur tema impurtant è er la tema da betg esser consequent avunda.
La finamira è da survegnir dapli levezza. Da pudair contextualisar las bleras infurmaziuns ed adattar a l’atgna situaziun da vita.
«Geniturs dad oz èn fitg attentivs. Els vulan educar lur uffants bain e quai sent’ins», di la cussegliadra da geniturs, Kristina Tschuor, en Vita e cretta. E quai fa la lavur cun las famiglias er bella.
Instinct matern na datti betg
«Nus avain in sentiment intern, dal venter», di Kristina Tschuor. «Babs, mammas ed er pèrs omosexuals han las medemas premissas da pudair emprender d’esser geniturs. In instinct matern na datti betg». Esser geniturs è in’abilitad che vegn emprendida e perquai dovri exempels. Ils exempels èn ils agens geniturs.
Per nizzegiar il potenzial da far chaussas auter ch’ils agens geniturs pon ins s’infurmar tar la cussegliaziun da geniturs. Nizzegià bler – cunzunt da las mammas – è Instagram. Ma qua vegnani surchargiadas cun infurmaziuns ch’èn grevas da metter a lieu. La cussegliaziun da geniturs po dar orientaziun. Quai po capitar a moda anonima ed il cuntegn dals discurs na va betg vinavant. Diagnosas na fa la cussegliaziun da geniturs naginas.
La cussegliaziun da geniturs è ina purschida nunbirocratica, anonima, la cussegliadra suttastat a l’obligaziun da discreziun ed ella na fa naginas diagnosas.
Per contactar la cussegliadra da geniturs na dovri nagina ordinaziun. Quai renda accessibel la purschida a moda fitg simpla.
Via directa tar la cussegliaziun da geniturs:
La Cussegliaziun da geniturs vegn sustegnida da l’Uffizi da sanadad dal Grischun. Ella è gratuita per geniturs e persunas da referiment d’uffants a partir da la naschientscha fin a tschintg onns.
