Guadench Dazzi
Pervi da corona ha il comité d'organisaziun desistì da la tschaina communabla e l'occurrenza usitada la sonda saira. Il giubileum è vegnì festivà dad ina vart cun la «giubilectura». 9 auturs ed auturas han preschentà lur texts ch'els han scrit a posta per il festival, cun il titel «litteratura ed jau». Da la partida èn stads Iso Camartin, Asa S. Hendry, Göri Klainguti, Gianna Olinda Cadonau, Leo Tuor, Benedetto Vigne, Gion Mathias Cavelty, Angelika Overath e Gerold Ehrsam.
Festivar cun osp da surpraisa
La dumengia da mezdi han Sara F. Hermann dal comité d'organisaziun ed il cabarettist Flurin Caviezel preschentà in omagi teatral-musical, per festivar ils 30 onns. Cun agid dals Tamburs da Domat.
Domat, il punct da cristallisaziun per la litteratura rumantscha
Er quest onn han divers auturs ed auturas e chasas edituras publitgà lur ovras novas sin ils Dis da litteratura u preschentà ellas:
- Alberto Palaia da la Surselva Romontscha ha preschentà l'ediziun giubilara dal Tschespet.
- Mevina Puorger ha preschentà in'ediziun e duas reediziuns da quatter auturs ramoschans.
- Anna Ratti ha prelegì or da ses nov cudesch «La chesa dals sömmis». In cudesch cun blers muments magics.
- Franz Hohler ha festivà vernissascha da ses cudesch biling «Fümader passiv/ Passivraucher».
- Laura Schütz ha preschentà ses raquint istoric biling «Hotel Destin» che gioga durant l'entschatta da l'hotellaria en Grischun.
Dapli public ch'ils ultims onns
Il comité d'organisaziun tira ina bilantscha positiva da questa 30avla ediziun dals Dis da litteratura. Cun totalmain radund 400 entradas durant l’entira fin d’emna ha l’ediziun dals Dis da litteratura attratg dapli public che l’onn passà. Sur tut il venderdi saira e la sonda sajan stadas dapli persunas, uschia Ralf Beer dal comité d'organisaziun.
D’attribuir è quai tenor las organisaturas ed ils organisaturs tranter auter a la pausa sfurzada d'in onn, al giubileum ed al program attractiv.
Ils 31avels Dis da litteratura han lieu dals 4 enfin ils 6 da november 2022.
Vulais Vus anc ina giada laschar repassar en detagl ils Dis da litteratura? Lura chattais Vus qua sut anc ina giada ils livetickers da venderdi, sonda e dumengia:
