«Ils gigants da tec vesan sasez sco schenis d’interprendiders», di il scienzià da medias Martin Andree sa referind sin in cudesch davart il suveran individual. «Els vesan ina gronda schanza en la transfurmaziun digitala per pudair dar adia al stadi democratic. Uschia na ston els betg pli pajar taglia e pon uschia s’enritgir da la destrucziun dal stadi democratic.»
Tge ch’ils libertaris da la dretga chapeschan sut libertad d’opiniun è libertad da rassissem, libertad da discriminaziun, libertad da disfamaziun, libertad da demagogia. Quai vul dir: fatgs ch’èn scumandads en l’Europa per bun motiv perquai che nus na lain betg che carstgauns vegnan stigads in sin l’auter.
Gia uss èsi uschia ch’ina gronda part da la populaziun na ristga betg da dir insatge en medias socialas perquai ch’ils discurs vegnan adina pli dirs. Quai er perquai ch’ils tec-gigants – lur algoritmus – vulan quai. Ed uschia pon ins observar ina restricziun significanta da la libertad d’opiniun.
Er vuschs moderadas ston vegnir udidas, er vuschs equilibradas. Ma sche nus laschain tiers odi, polemica e discriminaziun laschain nus tiers che la libertad d’opiniun vegn restrenschida adina pli fitg.
Il narrativ dals libertaris da la dretga – che la libertad d’opiniun saja en privel – è sco in tric. Davos il dies vegnan construids monopols da medias che controlleschan la publicitad, di Martin Andree.