Ils gigants da dark tec insceneschan sasezs sco sch’els vulessan liberar e proteger nus da regulaziuns da stadis u da regenzas. Ma dapi 10, 20 onns emprovan els da destruir activamain las medias redacziunalas sco p.ex. RTR, SRF u la NZZ. «Manipulaziun dal traffic è il sulet model da fatschenta da las plattafurmas», concretisescha Martin Andree en Vita e cretta. «Perquai è er mintga discurs da plattafurmas neutralas ina cuntradicziun da sasez.»
Las medias vegnan controlladas dals algoritmus da las plattafurmas. Ellas controlleschan tgi che vesa tge cuntegns. E las plattafurmas èn er quellas che manipuleschan cuntegns per motivs economics.
Las plattafurmas hajan tanta pussanza, perquai ch’ellas hajan enorm blers privilegis. E quels privilegis antidemocratics saja da stritgar. Senza quels na pudessan las plattafurmas betg exister.
Quai è il privlus tar ils monopols da medias sco Google, Facebook ni Instagram, che la glieud na chapescha betg ch’ella vegn controllada tras monopolists che persequiteschan be lur agens interess.
«Monopols da medias èn inacceptabels, en Germania per exempel era scumandads. Sche nus avain monopols da medias, n’avain nus naginas medias libras pli. Ed uschia perdain nus era la basa da nossa democrazia», di Martin Andree.