Avant precis in onn è Robert Francis Prevost, l'emprim American e l'emprim commember da l'urden Augustin vegnì elegì sco parusra da la Baselgia catolica. «Da l'emprim mument è Papa Leo stà in ambassadur da la pasch, el ha ditg cleramain Na a la guerra e Gea a la pasch», di Joseph Maria Bonnemain, l'uvestg da Cuira. En discurs cun Vita e Cretta declera el che Papa Leo XIV na saja betg in um politic, ma ses agir en il senn per la pasch e per l'umanitad hajan influenza sin la politica dal mund.
Jau sun impressiunà con cler che Papa Leo di Na a la guerra.
Da renfatschas dal president american en connex cun la guerra en l'Iran e las pretensiuns che Papa Leo n'acceptia betg armas nuclearas, na sa lascha il papa betg impressiunar declera Bonnemain. In cler segn tschentia Papa Leo ils quatter da fanadur. Malgrà l'invit uffizial dal president american Donald Trump da festivar 250 onns independenza, sa rendia Papa Leo sin l'insla Lampedusa tar ils fugitivs, là nua che Papa Francestg aveva fatg ses emprim viadi.
Sco Papa Francestg vul era Papa Leo defender ina baselgia che va tar il pievel, ina baselgia che dat sustegn a las persunas disavantagiadas e che vivan a l'ur da la societad en paupradad e supressiun.
Entant che nus pensain che Papa Leo saja responsabel per la cuminanza da la baselgia, essan nus sin la fallada via.
Joseph Maria Bonnemain vesa Papa Leo sco in um calm, reflectà cun il talent da tadlar bain e prender decisiuns ponderadas.
-
Bild 1 von 3. Ils otg da matg ha Papa Leo cumplenì ses emprim onn sco pontifex. Robert Francis Prevost è l'emprim papa american e l'emprim che vegn dal urden Augustin. Bildquelle: SDA.
-
Bild 2 von 3. «Jau mussas gugent la vopna da la famiglia prevost al Papa». En la sala da chavaliers dal chasté da la curt dal uvestgieu sa chatta la vopna da la famiglia Prevost. Bildquelle: RTR.
-
Bild 3 von 3. Joseph Maria Bonnemain . En la sala da chavaliers dal chasté episcopal a Cuira. Bildquelle: RTR.