Sch'ins guarda en la cronica dal chor maschadà da Laax, resorteschan ses ferm engaschi per lingua e cultura rumantscha.
L'onn 1986 han dunnas ed umens da Laax gì il desideri da fundar in chor. Cun 57 commembras e commembers ha l'emprim president Mariano Tschuor e l’emprim dirigent Giusep Giuanin Decurtins instradà in'istorgia da success il 1987. Da lezzas uras cun Rita Killias sco actuara, Werner Nay e Paulina Arpagaus sco assessurs e Giulia Capaul sco cassiera.
Festas da chant cecilianas, districtualas e chantunalas èn stadas da l’entschatta sin il program da lavur dal chor. Dapi sias entschattas ha il chor maschadà da Laax tgirà il chant profan ed embellì las festas da baselgia. Enfin l’onn passà èn quai stadas passa 200 messas u auters acts da caracter religius.
Oz èsi difficil da chattar persunas ch'èn prontas da s'engaschar per ina uniun cun las structuras da noss chor.
Avant 15 onns ha Erwin Ardüser surpiglià il tgamun dal chor. El è superbi da tut quai che «ses» chor ha cuntanschì en tut ils onns d'existenza. Ma dapi in temp è er il chor maschadà da Laax crudà en il circul vizius sco blers auters chors en nossas valladas rumantschas: la mancanza da chantaduras e chantadurs.
Senza commembers naginas preschentaziun, senza preschentaziuns nagina contribuziun culturala ed ecclesiastica en vitg.
Dapi 34 onns vegn il chor dirigì da Rest Giusep Tuor. Malgrà che commembras e commembers dal chor han pudì celebrar e sa participar a bels projects en ils prest 40 onns existenza, è la digren da chantaduras e chantadurs sa mussada consequentamain dapi l'onn 2005.
Cun excepziun dal project «150 onns Flurin Camathias», cun 30 commembers, è il dumber da commembers e commembras sa reducì dad onn tar onn. Actualmain dumbra il chor 10 commembras e commembers en ina vegliadetgna media da 70 onns. Damai ch'i n'è betg pussaivel da sa preschentar, ha la radunanza generala decidì da dar in onn pausa per chattar soluziuns.
Erwin Ardüser deplorass sch'il «Chor mischedau da Laax» stuess dar giu cassa e bandiera dal chor maschadà.
Senza il chor maschadà mancass in da chasa, ina canorta da cumpagnia e curturella.
En ils porxims mais sa stentan Erwin Ardüser, commembras e commembers vinavant per motivar e mobilisar persunas cun plaschair da chantar. L'uniun è averta per novas ideas ed impuls da la populaziun per amur da pudair salvar il chor maschadà sco uniun culturala da Laax.