Pli gugent in chor che nagin. Quai han las commembras ed ils commembers dals dus chors baselgia, il catolic ed il refurmà da Sagogn, ditg gia avant in onn e decidì da sa spusar cun far in'emprova da collavuraziun. Avant strusch in mais han ils zains da nozzas tutgà a Sagogn per la fusiun definitiva dals dus chors.
«En il decurs da quest davos onn d'emprova cun chantar da cuminanza èn ils dus chors baselgia s'avischinads», di Rita Gfeller-Vincenz, la presidenta dal chor baselgia fusiunà dapi strusch quatter emnas. «Nus avain sentì ch'i funcziuna bain da vart catolica e da vart refurmada. Ussa essan nus 32 commembras e commembers enstagl da la mesadad en mintga chor.»
Il chor baselgia refurmà sco era il chor baselgia catolic da Sagogn han tschertgà il contact in cun l'auter gia la primavaira 2023. «Il di da suppa ecumen chantavan nus schont dapi plirs onns ensemen», raquinta Rita Gfeller-Vincenz. L'onn 2024 haja ins fatg in ulteriur pass communabel cun chantar sco chors reunì a chaschun da la festa da chant districtuala a Trun e da Nadal 2024 sco chor baselgia en omaduas baselgias da Sagogn.
Salvar in chor sco finamira
Rita Gfeller-Vincenz ch'è creschida si a Sagogn e ch'era avant la fusiun presidenta dal chor baselgia catolic ha ditg ch'i na fiss strusch stà pussaivel da chantar anc ditg vinavant sco chor baselgia catolic cun mo circa 16 chantaduras e chantadurs. «Nus n'avevan era betg dirigenta u dirigent.» Ed era il chor refurmà sa chattava en ina situaziun sumeglianta cun la mancanza da chantaduras e chantadurs. «Pia avain nus fatg ord il basegn ina virtid cun mussar che nus da Sagogn vulain viver l'ecumena en la part musicala da las plaivs.»
In pass gagliard e historic
Il chor baselgia catolic da Sagogn è sa furmà l'onn 1976 cun l'intent da chantar per la messa nuvella da sur Alfred Cavelti il matg 1977. Il chor baselgia refurmà è vegnì reactivà l'onn 1991 suenter plirs onns pausa. «Tenor mai n'èsi betg stà in grond pass ussa per nus da s'avischinar», di la presidenta dal chor baselgia fusiunà.
«Ma igl è per omadus chors in pass gagliard e surtut istoric che na fiss betg stà pussaivel avant 20 onns a Sagogn perquai ch'il chor baselgia catolic aveva da quel temp anc bleras preschentaziuns en baselgia durant l'onn ecclesiastic. Oz è era quai sa midà. Nus catolics na chantain betg tantas giadas pli en baselgia», di Rita Gfeller-Vincenz.
Litteratura per omaduas baselgias
En il nov chor baselgia ecumen da Sagogn èn ins conscient ch'i dovra ina tenuta toleranta e cooperativa envers la differenta litteratura da chant dals catolics e dals refurmads. La presidenta dal chor fusiunà declera: «Il chor baselgia catolic ha adina era chantà messas en baselgia. Cun questa tradiziun vulessan nus cuntinuar almain da las festas grondas da la plaiv catolica.»
Ed era la plaiv refurmada haja sias atgnas festas, sco per exempel la confirmaziun u era il firà da Venderdi sontg. «Quest onn da Pasca avain nus per l'emprima giada en l'istorgia ecclesiastica da Sagogn chantà ina messa en baselgia refurmada. E nus avain gì fitg buns resuns», di Rita Gfeller-Vincenz.
Georg Candrian, il dirigent dal chor baselgia da Sagogn saja avert per la musica d'omaduas confessiuns, di la presidenta: «Il dirigent e nus chantaduras e chantadurs vulain cun la fusiun da noss dus chors era purtar la tradiziun musicala d'omaduas confessiuns en omaduas baselgias da Sagogn.»
Maridaglia cun contract
Ils dus chors baselgia da Sagogn han stuì prender ina decisiun dapersai ed approvar sco emprim il contract da fusiun. Suenter ch'omadus chors han ditg gea a quest contract, han ins la medema saira dals 28 d'october 2025 salvà l'emprima radunanza generala communabla cun eleger las funcziunarias ed ils funcziunaris, cun approvar ils statuts e fixar il program da lavur.
Rita Gfeller-Vincenz: «Nus essan fitg ventiraivels ch'il commembradi ha ditg gea unanimamain a la via communabla. Nagin n'ha ditg na e nagin n'ha chalà da chantar pervia da la fusiun.» Il program d'exercizis cun il dirigent Georg Candrian ha ussa cumenzà ed il chor vegn a chantar quest onn da Nadal en omaduas baselgias e lura a cuntinuar cun avair sis preschentaziuns en las duas baselgias enfin a nossa perdunanza da l'october 2026.