Siglir tar il cuntegn

Header

video
Corsin Tuor – dirigent cun corp ed olma
Or da Cuntrasts dals 15.01.2023.
laschar ir. Durada: 25 minutas 39 Secundas.
cuntegn

Musica da brass Corsin Tuor – dirigent cun corp ed olma

El ha fundà il Cerchel musical da la Surselva e dirigia pliras bands da brass da la classa superiura. Corsin Tuor da Trun è in renconuschì e passiunà dirigent da la musica da brass.

Cun 16 onns ha el dastgà diriger l’emprima giada in marsch tar la Societad da musica Trun. Suenter in pèr tacs perda el la survista.

Alura hai jau realisà l’emprima giada che diriger n’è betg uschè simpel sco quai ch’i vesa ora.
Autur: Corsin Tuor

Questa emprima emprova na decurascheschan betg il giuven Corsin. Pauc pli tard fundescha el il Quartet instrumental da Trun ed in pèr onns pli tard il Cerchel musical da la Surselva.

Il dirigent è cleramain il schef

Oz è Corsin Tuor in dirigent renconuschì en la scena da brass naziunala ed internaziunala. El è schef-dirigent da la Bayerische Brass Band Akademie (3BA) ch’è dapi onns campiun da la Germania. Medemamain è el dirigent d'ina da las pli excellentas bands austriacas, la Fröschl Hall.

En Svizra ha el dirigì enfin la fin 2022 la Brass Band Berner Oberland, ina da las pli capablas brassbands da la Svizra tudestga cun la quala el ha gudagnà il 2022 ils Swiss Open Contest.

Jau pretend ch’i vegnan en emprovas ed han trenà. Jau na sun betg qua per trenar cun els, jau sun qua per far musica cun els.
Autur: Corsin Tuor

Dapi 2009 è Corsin Tuor era docent da diriger en la scola auta dals arts da Berna.

video
Co è il dirigent Corsin Tuor avant in'occurenza?
Or da RTR dals 11.01.2023.
laschar ir. Durada: 1 minuta 36 Secundas.

Cumenzà ha tut en famiglia

Corsin Tuor è creschì si a Turn, qua ha era sia carriera musicala cumenzà. Gia da fitg giuven era el en la musica da giuvenils. Il plaschair per la musica instrumentala è vegnì sveglià en sia famiglia. Gia il bab Anton Tuor sunava en la musica e pli tard tut ses quatter fegls.

La sbrinzla per la passiun da brass è vegnida cun la ina platta da Black Dyke Mills Band ch’il padrin ha regalà. «Quella platta è ida di e notg.»

Il bab Anton Tuor cun ses quatter figls.
Legenda: Il bab Anton Tuor (amez) cun ses quatter figls (da san. Philip, Renato, Robert e Corsin) RTR

Avant da sa deditgar a la musica suonda Corsin Tuor la via da ses bab e far l’emprendissadi da chalger. El lavura in per onns sco chalger ortopedic e decida alura da studegiar musica al conservatori Lucerna ensemen cun sia dunna Jovita. Ses roms èn diriger ed sunar il eufonium. Suenter il studi è el durant 8 onns solo-eufonist tar la Brassband Bürgermusik Luzern.

Sper esser dirigent e musicist è Corsin Tuor era arranschader. Enfin oz ha el arranschà var 500 tocs e cumponì 9 tocs. Plinavant ha el registrà 20 discs cumpacts, tranter auter Classic Rock, Classic Cinema e trais discs Perlas Rumantschas.

audio
Davos la camera: Discurs cun la redactura Bertilla Giossi
ord Actualitad dals 13.01.2023. Maletg: RTR
laschar ir. Durada: 4 minutas 36 Secundas.

Or da l'archiv

L'eufonist Corsin Tuor (a dretga) dal 1987

video
Quartet instrumental da Trun
Or da Svizra rumantscha dals 14.06.1987.
laschar ir. Durada: 16 minutas 13 Secundas.
video
Cerchel Musical dalla Surselva
Or da RTR dals 19.12.1993.
laschar ir. Durada: 3 minutas 43 Secundas.

Cuntrasts

Artitgels legids il pli savens

Scrollar a sanestra Scrollar a dretga