Chanzuns rumantschas cumponidas da Rumantschas e Rumantschs na datti betg mo per chors. Adina ha la Svizra rumantscha er gì persunas che han scrit e preschentà lur atgnas chanzuns, las chantauturas ed ils chantauturs. Intgins da quels han gì l'occasiun a Zuoz, en la rama dal segund Festival da la Chanzun Rumantscha da preschentar lur ovras ad in concert. Quel è stà en il Globe (Lyceum Alpinum Zuoz). Igl è il medem mument era stà in inscunter da generaziuns. Chantauturas giuvnas e chantauturs giuvens, Chiara e Gianni Tschenett, han dà concert ensemen cun la generaziun pli veglia, Prefix e Ganes. Ina maschaida fitg attractiva.
L'Engiadinais Gianni Tschenett e sia band OAK Street ha fatg l'avertura dal concert . Era la chantadura da la Surselva, Chiara, è ina chantautura che fa gia dapi in temp attenta sin ella. Ella ha er fundà ina girl-group cun il medem num. A Zuoz ha ella preschentà intginas chanzuns, magari detg pensivas. Accumpagnà ella al clavazin ha Pascal Dittli.
Impressiuns dal concert
-
Bild 1 von 7. Prefix ha fatg gust per musica da rock. Bildquelle: RTR, Dominic Pohle.
-
Bild 2 von 7. Chiara ha inchantà cun texts profunds, al clavazin Pascal Dittli. Bildquelle: RTR, Dominic Pohle.
-
Bild 3 von 7. Las soras Elisabeth e Marlene Schuen da la gruppa Ganes. Bildquelle: RTR, Dominic Pohle.
-
Bild 4 von 7. Natalie Plöger, la bassista da Ganes. Bildquelle: RTR, Dominic Pohle.
-
Bild 5 von 7. Prefix – la band da rock da l'Engiadin'Ota. Bildquelle: RTR, Dominic Pohle.
-
Bild 6 von 7. Chiara chanta plain emoziuns. Bildquelle: RTR, Dominic Pohle.
-
Bild 7 von 7. La gruppa Ganes dal Tirol dal sid ha chantà en ladin. Bildquelle: RTR, Dominic Pohle.
Las furmaziuns han delectà giuven e vegl cun lur atgnas cumposiziuns e quai fin lunsch viaden en la notg. L'entir concert pudais er tadlar sin rtr.ch/festas. Là datti er da tadlar ils ulteriurs concerts ch'i ha dà al segund Festival da la chanzun rumantscha.