Festas da musica èn adina puspè in punct culminant per ina societad da musica, tant per musicantas e musicants sco era per las dirigentas ed ils dirigents. Natiralmain ch'ina tala finamira dovra engaschi supplementar, pertge mintga societad vul sa preschentar en ina buna glisch avant experts, public ed autras societads da musica. Per avair success dovri perquai er ina preparaziun minuziusa.
Da las 550 societads da musica che sa participeschan a Bienna, èn 13 ord il chantun Grischun. Ils dirigents Adrian Degonda da la Societad da musica Trun, Reto Lehner da l'Uniun Musicala Engiadina e Jürg Gysin da la Musikgesellschaft Union Chur èn vegnids en il studio da RTR per discurrer davart questas preparativas ch'els fan ed han gia fatg.
Toc da patg e toc da pensum
Cun Adrian Degonda e Reto Lehner avain nus discutà la preparaziun cun ils tocs da patg ed ils tocs da pensum. Adrian Degonda che dirigia la Societad da musica Trun, va la via «usitada». Gia l'atun ha el elegì il toc da patg, preschentà quel al concert annual e lura cumenzà ad exercitar intensiv il toc da pensum. Quel han tuttas musicas survegnì 10 emnas avant la festa.
Reto Lehner perencunter va tut in'autra via, bunamain ina in zic «temeraria». El ha tschertgà musicantas e musicants da l'Engiadina che han gust dad ir a Bienna. La finala hai dà bun 70 annunzias ed uschia va l'Uniun musicala Engiadina sco musica da project a la festa federala. Els han fatg be trais exercizis cun ils tocs inclusiv er il marsch per la concurrenza da marschar.
Marschar – cun u senza evoluziuns
Entant che la musica da Trun e l'Uniun musicala Engiadina marschan a moda tradiziunala, quai vul dir en retschas e colonnas ed adina enavant, va la Musikgesellschaft Union Chur dapi onns cun evoluziuns, quai èn figuras, sin la concurrenza da marschar. A Bienna van els per l'emprima giada insumma ad ina festa federala. Cun ses dirigent Jürg Gysin avain nus discutà co els preparan ina tala preschentaziun sin la via da marschar.
Las evoluziuns da la musica Union Cuira
La concurrenza da marschar da Bienna vegn filmada ed ils videos da las societads da musica chattais vus era sin Play RTR. Da las 550 societads da musica sa participeschan passa 430 a la concurrenza da marschar. Lezza ha lieu sin duas differentas vias per pudair rivar tras cun tut questas societads en quatter dis.
Il redactur Claudio Spescha è vidlonder da far in film da Cuntrasts cun la fascinaziun da la musica da marschar. Quel vegn emess la fin da matg 2026 a las 17:25 sin SRF 1.
