Eurovision Song Contest 2026 - Musica, in spectacul captivant ed ina «spokesperson» rumantscha

Cura è il ESC? Avert vegn l'emna da l'ESC ils 10 da matg cun la «Opening Ceremony» ch'ha lieu enturn la chasa municipala da Vienna. Ils dus mezfinals van ils 12 e 14 da matg sur il palc – ed il grond final ha lieu ils 16 da matg. Plinavant datti er ina u l'autra prova ch'è publica. Tut las shows han lieu en la halla da la citad da Vienna.

Ils dus mezfinals.

Avrir la box Serrar la box

L'emprim mezfinal ils 12 da matg chantan la Georgia, il Portugal, la Croazia, la Svezia, la Finlanda, la Moldavia, la Grezia, il Montenegro, l'Estonia, San Marino, la Pologna, la Belgia, la Lituania, la Serbia e l'Israel.

En il segund mezfinal ils 14 da matg èn da la partida l'Armenia, la Rumenia, la Svizra, l'Aserbaidschan, il Luxemburg, la Bulgaria, la Tschechia, l'Albania, il Danemarc, la Cipra, la Norvegia, Malta, l'Australia, l'Ucraina e la Lettonia.

Las shows da semifinal duran mintgamai radund duas uras e mesa, il final circa quatter uras.

Tgi è da la partida? Al ESC 2026 sa participeschan 35 pajais. L'Austria, la Gronda Britannia, la Frantscha, la Germania e l'Italia èn sco starters fixs qualifitgads directamain per il final. Ils ulteriurs pajais cumbattan en dus semifinals per 20 ulteriuras plazzas da final. Il mezfinal cun participaziun Svizra è ils 14 da matg.

Ils artists e las artistas al ESC 2026

Tgi va per la Svizra? Per la Svizra fa part Veronica Fusaro. Cun «Alice» porta Veronica Fusaro ina chanzun moderna sin il palc da l’ESC. Ina chanzun en il stil d’alternative-pop cun influenzas da rock che cumbinescha energia musicala cun in cuntegn cun ina clera perspectiva. Veronica Fusaro è in’artista che sa preschenta sin tribunas internaziunals e sias prestaziuns live fan gronda impressiun. Gia l'onn 2016 è ella vegnida selecziunada sco SRF 3 «Best Talent». 

Tge spetga ord punct da vista musical? Bunamain in pau da tut. Il Eurovision Song Contest porta in mix da vuschs e bands pli enconuschentas fin a newcomers. Da chanzuns per ballar, sur rock fin a beats pli dirs e pli stgirs, da texts superfizials fin critics e controvers datti ina vasta selecziun. La gronda part da las chanzuns è per englaisa.

Gira er insatge ordaifer la halla gronda? Tenor ils organisaturs duai il ESC esser visibel en l'entira citad da Vienna. Planisadas èn pli che 100 occurrenzas accumpagnantas. En il center stat l'uschenumnà «Eurovision Village» sin la plazza da la chasa municipala. Là datti public viewings, gastronomia internaziunala, concerts live ed ulteriurs puncts da program. Dentant duai tut la citad far l'apparita dad ESC. Punts, bigls, trams e schizunt vaguns da rument survegnan in design da Song Contest. In tram da la lingia 49 daventa schizunt in «tram da disco».

Tge u tgi è il mascottin? Il mascottin da l'ESC 2026 ha num Auri. El è lom, pinc e lila e stat per avertadad, respect, coesiun, creativitad e plaschair da star ensemen. Cunzunt uffants duain vegnir pledentads tras Auri. Vitiers duai er dar in cudesch d'uffants.

Nagin ESC senza discussiuns – tge dat da discutar? La participaziun da l'Israel procura ordavant per critica – quai pervi da ses agir en la Strivla da Gaza. Tschintg emetturs boicotteschan l'ESC pervi da la participaziun dal radio israelian KAN – concret èn quai ils Pajais Bass, la Spagna, l'Irlanda, la Slovenia e l'Islanda. La Spagna tutga atgnamain tar ils tschintg gronds. Dapli che 1'000 artists appelleschan en ina brev averta al boicot, plinavant èn annunziadas ina demonstraziun gronda ed ulteriuras acziuns.

Tgi è la persuna rumantscha che vegn menziunada en il titel? Noss redactur da Telesguard Livio Chistell daventa il «spokesperson» da l'Eurovision Song Contest. El po pia annunziar ils puncts da la Svizra. Per el saja quai ina grond'onur. Livio Chistell è numnadamain in grond fan dal ESC.