Gudagnà il 70avel ESC 2026 ha la chantadura Dara cun la chanzun «Bangaranga». Igl è l'emprima victoria per la Bulgaria al Eurovision Song Contest. La dunna da 27 onns ha survegnì tant ils pli blers puncts da la giuria, sco er dal public. «Bangaranga» vul dir tant sco chaos, tumult u disurden. Tenor Dara saja dentant er «il mument, nua ch'ins elegia amur e betg tema».
Sin il segund plaz sa tschenta l'Israel – accumpagnà da grondas protestas. La participaziun da l'Israel aveva gia ordavant procurà per critica – quai pervi da ses agir en la Strivla da Gaza. Tschintg emetturs avevan boicottà l'ESC pervi da la participaziun – concret èn quai ils Pajais Bass, la Spagna, l'Irlanda, la Slovenia e l'Islanda. La Spagna tutga atgnamain tar ils tschintg gronds. Cumplettà vegn il podest da la Romania.
Nagina participaziun Svizra il final
Puspè ina giada n'era la Svizra betg represchentada en il final. Cun «Alice» aveva Veronica Fusaro purtà ina chanzun moderna sin il palc da l’ESC. Ina chanzun en il stil d’alternative-pop cun influenzas da rock che cumbinescha energia musicala cun in cuntegn cun ina perspectiva clera. Ella n'aveva dentant betg persvas en il mezfinal.
In siemi rumantsch va en vigur
Malgrà nagina participaziun da la Svizra è tuttina ida en vigur in siemi dad in Svizzer. Noss moderatur e redactur Livio Chistell è stà la «spokesperson» svizra dal Eurovision Song Contest. El po pia annunziar ils puncts da la Svizra. Curt avant il final ha el anc discurrì davart l'organisaziun, tge che gira e co ch'el ha insumma survegnì quella lavur.
Curt suenter mesanotg è lura stà ses mument: Cun la citad da Cuira davos el ha el beneventà la glieud cun «Buna saira Europa!».