Il terz Festival da la chanzun rumantscha a Vella tutga gia tar il passà ed en l'emissiun Artg musical faschain ina sort bilantscha musicala da quest festival dentant er dal festival en general. Per Vella èn vegnidas inoltradas 45 chanzuns novas da 27 differentas cumponistas e cumponists. Tut questas chanzuns èn publitgadas sin la pagina da l'Uniun chanzun rumantscha. Sco quai che Clau Scherrer, president da l'uniun ha infurmà, vegnan en l'avegnir betg mo las chanzuns da Vella ad esser disponiblas mabain insumma tuttas chanzuns dals ultims trais festivals. En tut pia passa 130 chanzuns rumantschas novas.
Uss giaja persuenter da publitgar e derasar questas chanzuns han ditg Clau Scherrer ed era Giusep Giuanin Decurtins. Il District da chant Surselva ha planisà probabel il favrer 2026 er in'inscunter da dirigentas e dirigents nua che autras chanzuns (betg mo quellas dal final) vegnan preschentadas.
A Vella ma er gia als emprims dus festivals è dà en egl ch'ils texts da Arnold Spescha èn detg populars e vegnan tschernids il pli savens.
Chanzuns «simplas»
Simpel u chantabel – il public ha savens l'opiniun che las chanzuns sajan memia grevas per noss chors indigens. Giusep Giuanin Decurtins visescha sin il regulativ che prescriva «chanzuns chantablas per la pluritad da noss chors».
Igl è nunpussaivel da dar resposta, quai na vegn mai ad esser cler. I dat chanzuns simplas cun be intgins tacts ch'èn uschè grevas, ch'il simpel cuntegnia gia tut. Vulair far bain ina chanzun simpla è immens grev.
I saja pia giavischà chanzuns dumignaivlas per la gronda part da noss chors, betg per tuts chors. I saja er vegnidas inoltradas chanzuns da sis fin otg paginas cumponidas tras, chanzuns da patg per festas da chant. Quellas na sajan dentant er betg vegnidas en il final.
Sin Play RTR pudais vus as perschuader sez e giuditgar co i stat cun chantabel u betg.
Voting ha purtà objectivitad
A l'emprim festival da la chanzun rumantscha a Trun il 2019 ha il publicum elegì sco meglra chanzun en la categoria chor d'uffants «Mumma» da Flavio Bundi, la giuria ha mess ella sin plaz trais. Er en la categoria chor maschadà ha la giuria mess la chanzun «Aurora» da Gion Andrea Casanova, per il public era questa chanzun dentant il numer in.
Al segund festival a Zuoz (2022) ha il public votà per «Mamma» da Nina Mayer (giuria: plaz 4), «I chatscha di» da Helena Reisp (giuria: plaz 4) e «Himni alla primavera» da Flavio Bundi (giuria: plaz 3).
Auter è quai stà a Vella. Per l'emprima giada n'ha betg mo il public en halla u baselgia pudair vuschar mabain tuttas e tuts che han guardà sin rtr.ch il live-stream u tadlà en il radio RTR la concurrenza. Fitg probabel è quai la raschun ch'i ha dà questa giada en trais categorias victurs dubels, vul dir ch'il cumponist ha persvadì tant la giuria sco er il public. Reussì è quai a David Lang, Cyrill Schürch e Flavio Bundi. Sulet en la categoria chor d'uffants hai dà dus victurs, là ha la chanzun «Anusha» da Jan van der Roost plaschì meglier al public che la chanzun «Salva el cor» che la giuria ha mess sin plazza in.
