Inspirada da poesias englaisas ha la chantautura Julie Fox scrit divers texts per sia proxima platta «Each Heart Is a Garden». Ina da las chanzuns da quest album è «Best Years». Co il titel tradescha tematisescha Julie Fox ils megliers onns. Dentant betg en in senn retrospectiv, magari melanconic mabain sco insatge chi dat adina puspè. Dals megliers onns ch’èn passads pon ins emprender insatge e prender cun positivas memorias. Quels megliers onns cumenzan dentant adina puspè, mintga mument. Per la musicista è stà impurtant ch’il messadi da la chanzun saja era reflectada en la melodia. Perquai saja la chanzun scritta en tact da 6/8 – quai duess dar il sentiment sco d’esser en ina bartga che ballantscha sur las undas. In simbol per la vita che na giaja era betg adina be a dretg ora.
Quai messadi da «Best Years» po ella ussa preschentar durant l’entir october en Svizra en ils radios da RTR, SRF 3, Couleur 3 e Rete Tre.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
Il 2024 è Julie Fox gia sa preschentada tar nus en la RTR Lounge durant la sonda Lunga a Cuira.
Mintga emettur che sa participescha a l’acziun po proponer artistas ed artists. Sur ils ultims onns han uschia gia differents acts grischuns ed acts rumantschs gì la schanza da sa preschentar durant in mais en l’entira Svizra. Per exempel ANIKK, Fiona Fiasco, Paula Mia, Omisdus, ladunna, Nesta And The Blondes, Happy For Real ed anc blers e bleras dapli.
